Vawiin chawhnu dar 1.00 khan Durtlang Higher Secondary School chuan kum 2011-12 HSSLC result-a an school atanga zirlai hlawhtlingte chawimawina inkhawm an School-ah an huaihawt a; he hun hi Assembly Speaker Pu R. Romawia chuan a hmanpui a ni; zirlai hlawhtlingte hnenah hian lawmpuina tangkafai a hlan theuh a ni.

Pu R. Romawia chuan Mizo hnam lungphum chu kan thinlung chhungrilah a innghah thu a sawi a. “Mizo mipuite hian ram leh hnam kan vei dan hi kan chhut chian a ngai hle a; mahni khawtuala hnam dangte laka inveivung ringawt hi nationalism a ni lo a; communalism a ni zawk. Kan thinlungah Mizo nihna hi a nget chhe mek niin a lang a, chumi rah chhuah thil thalo tam tak chu a takin kan tawng ta niin a lang” a ti a. Pipute nunze hlu – taimakna, rinawmna, huaisennate chu tunlai huna Mizote nun khaidingtu a nih leh theihna tura tanlak a ngaih thu sawiin, “Khawi hmunah pawh awm ila, Mizo ka nih tlat avanga huaisen tur, rinawm tur leh taima tur ka ni tih kan vawn reng tlat chuan Mizo hnam hi a ropui zual zel ang” Pu R. Romawia chuan a ti a. HSSLC exam. a hlawhtlingte chu anmahni kawngzawh tur theuhah malsawmna dawng thei khawpa taima turin a fuih a; zirlai zinga hlawhtling zo ve lote pawh an rilru tipaukhauh tura fuihin, “Mihring nun kawngah hian beidawnna hian hmun a chang thiang tur a ni lo” Speaker Pu R. Romawia chuan a ti a ni.

Durtlang HSS hi kum 2003 khan khawtlang mamawhna avanga din tan a ni a; hemi kum atang hian MBSE hnuaia HSSLC exam-ah za zela sawmruk chunglamin an la passed zat zat a ni. Kumin 2011-12 khan zirlai 76 zinga 67 an passed a; Lallianpuii leh Lalruatpuii te chu 4-na leh 7-na an ni nghe nghe a ni. Distinction-ah Mizoram-a school malkhaia zirlai passed tam ber an ni a, zirlai 6 distinction-ah passed in; first division 12, second division 19 leh third division 30 an nei a ni. Zirlai hlawhtlingte hnenah hian School Managing Board chuan certificate a hlan theuh bawk.