Vawiin khan Mizoram Hmeithai Association (MHA) enkawl, Residential School for Privileged Children, Luangmual chuan Guardians’ Day an hmang a. Speaker Pu R.Romawia chu Khuallian a ni a. M.I.Batham, Inspector General, BSF chu Khualzahawm a ni.

Kum 1998 a din Residential School for Privileged Children ah hian kum tin chawh rualin zirlai 100 vel awm ang an ni a. Ministry of Tribal Affairs hnuaia tanpuina an dawn atangin MHA chuan heng naupangte tan hian a thlawna zirna leh awmna hmun hi a buatsaihin a enkawl a ni.

Thu sawiin Speaker Pu R.Romawia chuan Mizoram hmun hrang hranga fahrah enkawlna hmun te, ruihhlo ngai, hmeichhe rahbi tleute leh mi chanhaite enkawlna hmun hrang hrang te hian Mizo te inlainatna leh tanrualna a pholang a ni, a ti a. MHA ten hmeithai mi rethei fa ten a thlawna zirna an neih theihna tura Residential School for Privileged Children an lo din chu chhuanawm a tih thu sawiin fahrah naupangte chu beidawng hauh lova hma lam hun thlir turin a fuih a. Khawvel pum huapa mi ropuite zingah leh Mizo zingah ngei pawh nu leh pa nei lo mi hlawhtling tam tam an awm tiin zirlaite chu midangte tana malsawmna la ni thei ngei tura inzir chhuak tur leh helai hmun hi la enkawl let ve thei zawk tura rilru nei turin a chah a ni.

Mizo hnam nun tlachhe mek a vei thu tarlangin Pu Romawia chuan pi leh pute tlawmngaihna te, an huaisenna leh midangte tana an inpekna thinlung khan kan inthuam thar leh hi a tul tak meuh va ni, a ti bawk.

Guardians Day lawmna inkhawm hi MHA President Pi Veronica K.Zatluangi’n a kaihruai a. School naupang ten hnam lam leh zai te an entir a. Speaker chuan Residential School for Privileged Children tanpui nan Rs.10,000/- a hlan a. Ani bakah hian Er.K.Lalrimawia, Chairman & MD, Royal Engineering & Architechtural Consultant pawhin tanpuina Rs.5,000/- a hlan bawk a ni.