Mizoram khawvela thu leh hla-a sulhnu ngah ber leh mi ngaihsan hlawh ber te zing ami J.F. Laldailova’n kum 1965-1977 inkara a thuziak ngaihnawm tak tak lawrkhawmna lehkhabu ‘Thu Ngaihnawm’ tia vuah leh a fapa tlum ber Peter Lalthangkima (J.F. Jr. tia hriat lar) lehlin ‘Web of Deceit’ chu vawiin khan Mizoram Speaker Pu R. Romawia’n Aizawl Press Club-ah a tlangzarh.

Tlangzarh inkhawm Pu P.C. Biaksiama kaihhruaiah hian Pu R. Romawia chuan lehkhabu reng reng te chu “awm lo ata awm” an nih avangin an hlu em em a, vawiina lehkhabu thar pahnih lo piang te pawh hi Mizo fate tan lehkhabu tha leh Mizo tawng ti hausatu a nih ngei a beisei thu a sawi a. Mizote zingah thu leh hla lama mahni nu emaw pate hnungzui an awm mang lo laia Pu J.F. Laldailova fapa-in a pa sulhnu chhui a, thu leh hla lamah a pa kutchhuak leh ama kutchhuak ngei pawh Mizote chhiar atan a rawn hlui thei hi a lawmawm hle a ni, a ti. Tawng hi hnam anga min phuarkhawmtu leh humhalhtu pawimawh tak a nih avangin lehkhabu buatsaihtute leh Mizote tan thu leh hla lama theihtawp chhuah tu zawng zawngte chu duhsakna a hlan a ni.

Vawiin lehkhabu tlangzarh inkhawm-ah hian Pu C. Chhuanvawra’n J.F. Laldailova ‘Thu Ngaihnawm’ thlirlawkna a nei a, J.F. Jr. lehlin ‘Web of Deceit’ chu Dr. Lalchhuanawma Tochhawng in a thlirlawkna hun a hmang thung a ni.