2065/2025-2026

Aizawl the 10th September, 2025 : Election Commission of India chuan vawiin ni 10.09.2025 (Nilaini) hian State leh UT zawng zawnga Chief Electoral Officer-te Indian International Institute of Democracy and Election Management (IIIDEM), New Delhi-ah conference a neihpui. Dr. Lalrozama, Chief Electoral Officer, Mizoram pawh conference-ah hian telin, Pi Ethel Rothangpuii, Joint Chief Electoral Officer, Mizoramin a tawiawm a ni.

Conference-ah hian ram puma Special Intensive Revision of Electoral Roll neih tur atana inbuatsaihna kalpui mek dan sawi ho a ni a. Special Intensive Revision of Electoral Roll hi tunah Bihar state-ah neih mek niin State leh UT dang zawngah pawh neih thuai beisei a ni.

Pu Gyanesh Kumar, Chief Election Commissioner of India chuan Conference tan tirhah thu sawiin Electoral Roll felfai leh dik zawk kan neih theih nan Special Intensive Revision hi neih a tul tih a sawi a. Special Intensive Revision-ah chuan Electoral Roll a thar hlaka buatsaih tur a nih avangin mipuite kan inziahluh thar vek a ngaih tur thu a sawi bawk. Electoral Roll-a kan hming a chuan theih nan kan kum leh pianna hmun ti chiang thei tur lehkha pawimawh (document) thehluh theih hrang hrang Election Commission of India chuan a ruat a, Special Intensive Revision neih hnuhnung ber Electoral Roll a hming chuang tawhte tan erawh Electoral Roll-a an hming lanna phek bak document dang thil tel a ngai dawn lo a ni. Chief Election Commissioner of India bakah hian Election Commissioner pahnih ten thu an sawi bawk.

Chief Electoral Officer, Bihar chuan Special Intensive Revision an kalpui mek dan report an pe a. Sawm an nih angin Dr. Lalrozama, IAS, Chief Electoral Office Mizoram bakah State dang zawng zawng Chief Electoral Officer te pawhin Special Intensive Revision atana an inbuatsaih tawh dan bakah an state chhunga voter dinhmun leh Special Intensive Revision neih hnuhnung bera an state dinhmunte presentation an pe bawk a ni.

Tun dinhmunah Mizoramah voter mipa 422319 leh hmeichhia 450367, a vaiin 872686 kan awm a. Kum 2005 khan Mizoramah Special Intensive Revision neih hnuhnun ber niin voter mipa 276488 leh hmeichhia 280274, a vaiin 556762 kan awm thung a ni. Kum 2005 Special Intensive Revision neih tuma Electoral Roll chu Chief Electoral Officer, Mizoram website ceo.mizoram.gov.in/ ah dah niin, mahni a lo in zawn chhuah theih a ni.