Sawrkar laipuia Ministry of Youth Affairs bultuma SSA, Social Welfare Department leh Sports & Youth Services tangkawpte buatsaih Rualbanlo/Vohbikte puala infiamna ‘Special Olympic Bharat, Mizoram Chapter - 2018’ chu vawiin khan Chhangphut Field, Champhaiah neih a ni. He hunah hian Pi H.Zaimawii, District Programme Officer (DPO), Social Welfare Department chu khuallian a ni.
Khuallian chuan rualbanlote tana Special Olynpic buatsaih ani chu lawmawm a tih thu a sawi a. India ramah rualbanlote a bik takin hmeichhia ten enhran an hlawh zual bik thu leh hengte hi sim a hun tawh thu a sawi a. Rualbanlote puitlin hun thlenga rualban zo lo tur anga ngaihna lian tak kan neih thin hi bansan a hun tawh thu sawiin, “An thiam ang tawk tur zirtir an ngai a, enkawl dan a zirin hma an sawn zel thin a ni”, a ti a. Khawvel pawhin Vohbikte tana infiamna buatsaih hi angai hlu em em a, kum 1968 atang tawh khan International Special Olympic pawh a lo huaihawt tawh thu a sawi a. Hei hian rilru leh taksa lama chaklote puiin chakna leh huaisenna a pe thin a ni, a ti a. Social Welfare Department kaltlangin rualbanlote tan hmathatna hrang hrang siam thin niin Rualbanlo pension, Loan leh thil dangte a awm thu leh hengte dawng tur chuan rualbanlo certificate leh ID te neih erawh angaih thu a sawi a. Special Olympic hmang tura kalkhawmte chu infiamna hun nuam leh tluang tak hmang turin duhsakna a hlan a ni.
He hunah hian Pi Sarah Kimi Pachuau, Programme Manager, Special Olympic Branch, Mizoram Chapter pawhin thu sawiin Special Olympic chu Khelo India Scheme ken tel a nih thu a sawi a. Special Olympic thupui ‘Play Unified, Play for Inclusion’ chuan rualbanlote chauh ni lo, mi pangaite pawh tel ve na a nih thu tarlangin, hemi hian inpawh leh intluktlang taka infiamhona hun siam hi a tum a ni, a ti a. Sports hmanga rualbanlote chawikan leh anmahniah inrintawkna siam hi sawrkar in a ngaipawimawh hle a ni, a ti a. Tun aia nasa zawka hmalak zel sawrkarin a tum thu a sawiin kutthemthiamna leh intodelhna lam hawia hmalak pawh tum zel a nih thu a sawi a. District huapa tithate chu state aiawh mai bakah ran pum aiawh a tel leh zel na tur pawh a awm thu sawiin chumi tur chuan nu leh pa leh anmahni kaihruaitute pawh lo inpuahchah lawk turin a chah a. Programme buatsaihna atana SSA, Social Welfare Department leh Sports and Youth Affairs lam te tawiawmnaah lawmthu a sawi bawk a ni.
Vawiin Programme hi Pi K.Lalsiamliani, District Project Coordinator (DPC), SSA Mission Champhai District-in a kaihruai a. Special Olympic-ah hian infiamna hrang hrangte buatsaih niin medal leh certificate te sem chhuah a ni a. Vohbikten an hlimpuiin hun nuam tak hman a ni.
Champhai District-ah dinhmunah Rualbanlo 940 vel awm anga chhut a ni a. Vawiin hun hmannaah hian Champhai khawchhung leh a chhehvel atangin Vohbikte, anmahni enkawltu leh line department aiawhte an tel a ni.
