Rilru lama rualbanlote tana infiamna hrang hrang hmanga tanpuitu ropui tak ‘Special Olympics’ chu Mizoramah pawh Spastics Society of Mizoram hmalaknain naupang rualbanlote tan vawiin khan Electric veng YMA Hall-ah ‘Special Olympics : Bharat’ hnuaia ruahmanna pakhat ‘Healthy Athlete : Fit Feet Program’ chu huaihawt a ni a. He hun hi Finance Minister Pu H.Liansailova’n a hmanpui a, Parliamentary Secretary leh Spastics Society Patron ni bawk Pu Lal Thanzara te nupa pawh an tel.
Minister Pu H. Liansailova chuan hetiang programme buatsaihtu Spastic Society-te chungah lawmthu a sawi a, Pathian mithmuhah chuan in angtlang vek kan ni, a ti. Chhungkaw zingah pawh pianphunga rualbanlo leh ramtuileilo an awm pawhin phurrit anga ngai lovin, chona lian tak awm chu hmangaihna nen huai takin hmachhawn tur zawk kan ni, a ti.
Vawiina hun hman Spastic Society Chairperson Pu Zokhumi Vankung kaihhruaiah hian naupang engemawzat ke endik sak an ni a, an bun thiam zawng pheikhawk leh mawza pek an ni. Hemi ti tur hian Dr.Subhash Chandra, Asia Pacific Region leh Dr.Hema B. Singh, Paedetrician te an lo kal a. Nimin atanga he programme buatsaih ah hian pianphunga rualbanlo naupang 200 chuang zet endik niin an mamawh hrang hrang tur ruahman sak an ni a, heng hmang hian infiamna chi hrang hrang khel thei tura buatsaih zel tur an ni.
