Ni 1.1.2013 a kum 18 tling chin Electoral Roll a khung vek na tur Special Summary Revision inbuatsaihna kal zelah vawiin khan a thawhhnihna (2nd batch) atan Booth Level Officer training pe tu tur trainers te tan zirtirna hun ni hnih awh Agriculture Conference Hall-ah neih leh a ni a.

A hawnna hun hi Joint Chief Electoral Officer Pu H. Lalengmawia chuan a kaihruai a, Chief Electoral Officer Pu K. Riachho, IAS in a hawng. Hawnna thu sawiin Chief Electoral Officer Pu K. Riachho, IAS chuan training thawkhatna (1st Batch) ni 25 leh 26 June, 2012 a neih khan hlawhtling taka neih zawh theih a nih chu lawmawm a ti a, tun tum a thawhhnihna (2nd Batch) a lo tel te pawh rilru leh tihtakzeta training hun hmang turin a chah a ni. Kumin Electoral Roll ennawn pawimawh bik dan sawiin nakum a inthlang mai tur kan ni a, chuvangin uluk leh fimkhur taka kalpui a tul bik a ni a ti a. Nakum inthlan hma hian ennawnna hun neih leh hman a ni tawh lo mai thei a, hei vang hian Electoral Roll dik leh fel fai, tihsual awm lo neih a tul a, revision atana thawktu a lian ber atanga a te ber thlengin mahni hna theuhah rinawm tak leh dik taka thawk turin a fuih a ni. BLO-te training an pek hunah chuan chipchiar tak leh uluk taka zirtir chhawng turin a chah bawk.

He training hi Aizawl, Mamit, Kolasib, Champhai leh Serchhip District te tana buatsaih a ni a. Hetiang bawk hian a thawhthumna (3rd Batch) chu Lunglei-ah ni 3 leh 4 July, 2012 hian Lunglei, Lawngtlai leh Saiha District te tan buatsaih leh a ni ang.

Heng trainer te hian anmahni bial theuhah BLO te training July thla chhungin an pe ve leh chhawng dawn a ni.