Vawiin hian Serchhip District Election Officer, Pi Sangchhin Chinzah chuan kum 2018 Electoral Roll, January ni 5, 2018 a Final Publication neih tur Special Summary Revision bul tanna Draft Roll, 2018 a tlangzarh. 

Pi Sangchhin Chinzah chuan, mipuite rorelna ram a cheng kan nih angin India khua leh tui dik tak, kum 18 tling chinte chuan Electoral Roll kan ngaipawimawh tur a ni a. Kan chanvo a nih ang ngeiin ram hruaitute thlan hunah pawh vote kan thlak ngei thin tur a ni, a ti a. Nakum, 2018 hi MLA thlan kum te alo nih tawh avangin kumin Summary Revision hi Summary Revision kan neih theih hnuhnung ber a ni thut thei a. Chuvang chuan kumin Summary Revision hi mipuiten ngaihven leh zual se a tha hle a ni, a ti bawk. 

Election Commission of India in ruahmanna a siam angin Electoral Roll 2018 Draft Roll tlangzarh ni atan vawiin hi ruat a nih angin Serchhipah hian Draft Roll hi tlangzarh a ni a. Vawiin atang vek hian Electoral Roll a hming dah lut thar duh tan hun hawn tan niin, nakum January ni 1 a kum 18 tling turte tan Roll a inthun luh hi dil theih a ni ang. Chubak ah chuan paih ngai paihte, hming ziahdan siam that leh thil tul dangte pawh dilna hun hi hawn nghal a ni bawk. Dilna hi 13.10.2017 thleng thehluh theih a ni ang a, chumi hnuah ERO, AERO leh Election Branch lam ten heng dilna hi an endik leh vek hnuah 5^th January, 2018 ah Electoral Roll thar chu tlangzarh a ni dawn a ni. 

Draft Roll a a lan danin Serchhip District chhung Assembly Constituency pathuma voters dinhmun chu hetiang hi a ni. 

 Kum 2017 January, ni 5 atanga vawiin Draft Roll, 2018 tlangzarh ni, 15^th September, 2017 inkara continuous updating kalpui chhunga hming ziahluh belh dinhmun chu hetiang hi a ni. Serchhip A/C ah mi 240, Tuikum A/C ah mi 67 leh Hrangturzo A/C ah mi 66, a vaiin mi 373 an ni. 

Vawiina Draft Roll tlangzarh naah hian Political party aiawh te, tlawmngaipawl aiawh te, Election lama thawktu hrang hrang leh DIPRO te an tel a ni.