Vawiin khan Aizawl DC leh District Election Officer ni bawk Pu Franklin Laltinkhuma IAS hovin a Pisa-ah District Level Standing Committee chu Special Summary Revision of Electoral Rolls 2012 chungchangah an thukhawm a. Special Summary Revision neih dan tur programme duan lawk chu kimchang takin an thlir ho, uluk takin a neih dan tur an sawiho bawk a ni.

Revision programme duan lawk ang chuan Draft Electoral Roll hi 1.10.2012-ah tarchhuah tur a ni ang a. Ni 1.10.2012 leh ni 31.10.2012 inkarah dilna (claims) leh sawiselna (objections) te chu thehluh thei a ni ang. Local Council leh VC ten Roll chhiar chhuahna hun leh hming endik hna chu October ni 6 leh ni 9, 2012 ah te an veng theuh ah an buatsaih ang a. Dilna leh sawiselna sawihona hun ‘Special Campaign Dates’ chu October ni 8, ni 15 leh ni 22 ah neih a ni ang. December ni 1, 2012 thleng heng dilna leh sawiselna te chu chinfel tur a ni ang a. Final Electoral Roll chu January ni 5, 2013 ah tarchhuah a ni ang.

Ni 31.10.2012 thleng dilna hrang hrangte hi bialtu ERO/AERO/BLO/DO te hnenah theh luh theih a ni ang. Kum bithliah tehfungah chuan ni 01.01.2013-a kum 18 tling chin an ni tur a ni.(ni 01.01.1995 leh a hma lama piang tihna a ni). Summary Report hi ni 05.11.2012 ah Joint Chief Electoral Officer, Mizoram hnenah theh luh a ngaih avangin a buapuitu te chu meeting chuan ngai pawimawh leh fimkhur taka figure te buatsaih turin an chah a ni.

Hearing programme hi advance in DEO, ERO leh EO te pek vek tur a ni. Form hrang hrangte chu endik a, Hearing neih a nih hnuah AERO-ten bialtu ERO hnenah hearing an neih zawh hmasak apiang an theh lut zel tur a ni ang a, Hearing hi ni 16.11.2012 aia tlai lovah zawh vek tur a ni bawk ang.

Aizawl District ah hian Assembly Constituency 14 a awm a, Draft Abstract Statement ah a lan dan chuan Aizawl District-ah hian Polling Station 293 awmin, Electors 2,45,153 an awm a ni (Service Voters 1627 tiam in).