Mizoram University hnuaia Department of Horticulture, Aromatic & Medicinal Plants, School of Earth Sciences & Natural Resources Management huaihawtin vawiin khan ‘National Seminar on Horticulture for Livelihood Security, Economic Prosperity & Sustainable Development’ neih tan a ni a, Khuallian Horticulture Minister Pu H. Liansailova’n Seminar a hawng.

MZU New Administrative Conference Hall-a hawnna inkhawm neihah Minister Pu H. Liansailova chuan ramchhung University hrang hrang atanga mithiam rual rawn kalkhawmte chu lawmin Mizoram-ah horticulture tihhmasawnna tur kawng tam tak a inhawn thu a sawi a. Mizorama chengte zaa 70% te chu tlangram loneimi an nih thu sawiin Minister chuan tlagram lonei hi thingtlang lam ti retheitu leh Mizoram hmasawnna than mawhbawk ber a ni a, hemi sukiang turin state sorkar chuan NLUP a duan chhuah thu te, tlangram lonei aiah horticulture leh loneih dan ngelnghet zawk thlan tir an nih thu te leh chhungkaw 45,000 chu tanpuina pek an ni tawh bakah a dang 45,000 te chu thlanchhuah ni tawhin kumin chhung ngeia bul an tan theih nan tanpuina pek an nih tur thu te a sawi a ni. Mizoram-in hmasawnna kawng thar a zawh tan lai tak a nih avangin vawiina Seminar an neih tur chu a hun hlea a hriat thu leh mithiam rual ten Mizo loneimi thei chin lam thlangtu hmakhua ngaihtuah rana hmalakna tur tha zawk leh hlawk zawk an duanchhuah ngei a beisei thu a sawi bawk a ni. Rampum-ah 1950 chho bawr vel khan ‘Green Revolution’ hmangin agriculture hmel thlak danglam a ni a, hei hi zawi zawiin vawiin thleng pawh hian ram hmun thenkhatah kawng hrang hrangin kawng ro a la su reng a, Mizoram-ah pawh NLUP hian thui takin hmasawnna rahbi tharah Mizoram state chu a hlankai ngei a beiseiawm thu a sawi a. He Seminar-a horticulture leh a kaihhnawih hrang hrang an ngaihtuah ho turte chu loneimi rethei zawkte nun khawihpha tur thil a nih avangin, an eizawnna kawngah tihdan phung tha zawk leh an hlawk zawka an tharchhuah hralhna tur thleng sawiho turin a chah a ni.

MZU Vice-Chancellor Prof.R.Lalthangtluanga chuan khawvel kalphung leh khawsak inher danglam zelah sa leh sa atanga siam thil ei tam ai chuan thlai leh thei a hrisel zawk zia te hriatchhuah a ni zel a, mi tam tak ten sa pawh ei tawh lovin taksa hrisel zawk nan thei leh thlai chauh an ring tawh a ni, a ti a. Chuvangin Horticulture hi eizawnna tlak tak tak ni tawhin, Mizorama thlai leh thei tharchhuahte pawh hralhchhuah a harsat loh a rin thu a sawi a. Loneih chuan nasa takin thing leh mau, ram, sik leh sa, boruak thleng a khawih chhiat theih avangin Mizote chuan lo neih dan tha zawk leh hlawk zawk an mamawh a ni, a ti.

National Seminar on Horticulture hi North Eastern Council, Mizoram University, Ministry of Science & Technology leh National Mission for Horticulture for NorthEast & Himalayan States (NMNEH) bultum niin September ni 24-26, 2012 chhung neih a ni dawn a. He Seminar-ah hian VCK Vidyalay, West Bengal; NERC, Nagpur; YS Parmar University, Solan, Himachal Pradesh; ICR, Pusa, new Delhi; Rajasthan Krishi Vidyalay; CAU, Pashighat, Arunachal Pradesh; Indian Institute of Horticulture, Bangalore leh hmun dangte atangin mithiam 65 lai an rawn tel a ni. Seminar chhung hian heng mithiam fuankhawmte hian an thuziak te chhiar chhuakin an thil hmuh leh hmachhawp hrang hrangah te huam zau taka sawikhawmna leh inrawn khawmna hun an hmang dawn a ni. Vawiin Seminar hawnna inkhawm hi Prof.P.Rinawma, Dean, SES&NRM, MZU in a kaihruai a, Seminar chungchang Dr.T.K.Hazarika, Organising Secretary-cum-Convener-in a sawi zau a, Organising Committee Chairman Prof.B.P.Nautiyal-in inkhawm khar nan lawmthu a sawi a ni.