Mizoram Baptist Kohhran hnuaia Relief & Development Deptt leh Lunglei District High Powered Committee chuan ram inhawh sak chungchangah vawiin khan Circuit House Conference Hall-ah thawhhona thuthlung an ziak. Hemi puala inkhawm hi Pu R. Lalrosanga HPC member in a kaihruai.

HPC Vice Chairman Pu Joseph Lalhimpuia chuan thu sawiin, zirna leh hriselna lamah Kohhran leh sawrkar ten thawhhona tha tak kan neih thin avangin hmasawnna pawh nasa takin hmuh tur a awm a, ei leh bar lama intodelh tur pawhin Kohhran te nen hian thawhho hi thil pawimawh leh remchang tak ani a ti. BCM hnuaia R&D ram Kanghmun South ami chu HPC in ei leh bar a intodelhna tur atan a hmalakna turin kum 15 a hawh sak dawn thu Pu Mahima chuan sawi bawkin, hetianga mirethei zawkte tana eizawnna tangkai leh intodelhna kawnga hmalakna pawimawh taka BCM nen inremna tha tak an nei thei chu lawmawm a tih thu a sawi a, hun lo la kal zel turah pawh ram hmasawnna tur atan thawhhona tha tak neih theih zel nise a duh thu leh, Kohhran chuan sawrkar hmalakna hrang hrang ah finchhuah thin se a duh thu a sawi bawk. BCM General Secretary Rev.H.Lianngaia pawhin thu sawiin, sawrkar hian kohhran hote min ngaihsak hle a, puih kan ngaihna ah an tlanchhe ngailo a ni tiin, hetianga HPC nen thawhhona tha tak an neih theih avanga lawmthu sawiin, ram leh mipuite tana rawngbawlna pawimawh tak a ni a ti. Vawiin a thawhhona an ziakna chhan HPC in BCM ram a hawh tur Hectre 4 a zau-ah hian Model Land Use Centre siam a ni dawna, hetah hian ei leh bara intodelhna turin Agriculture leh a kaihhnawih Deptt hrang hrang ten hma an la anga, Rest House leh Training Centre sak a ni dawn bawk a ni. He hmalakna tur hi HPC enkawlna hnuaiah kuthnathawktu te nena in zawm Deptt hrang hrangin kum 15 chhungin hma an la anga, hemi hnu-ah hian HPC hian a enkawl chhunzawm theilo anih pawhin BCM R&D in a enkawl chhunzawm dawn a ni.