Vawiin khan Pu K.Riachho IAS, Chief Electoral Officer hovin a Pisa-ah kumin a Special Summary Revision of Electoral Rolls neih dan tur chungchangah meeting pawimawh tak neih a ni a. Meeting ah hian Aizawl DC leh District Election Officer ni bawk Dr. Franklin Laltinkhuma, IAS, Joint CEO Pu H Lalengmawia, Election Department aiawh te, political party hrang hrang aiawh te leh tlawmngai pawl thenkhat aiawhte te an tel a ni.
Pu K.Riachho chuan kumin a Roll Revision neih tur hi nakum MLA inthlanna a Electoral Roll a hman tur anih dawn avangin kum dang aiin kumin Roll Revision hi a pawimawh bik a, nasa zawk a fimkhur pawh a tul thu a sawi. Inthlanna felfai leh thianghlim nei tura pawimawh hmasa ber chu Electoral Roll dik leh felfai buatsaih hmasak hi a ni a ti a. Meeting ah hian kumin 2012 Roll Revision neih dan tur (a hun) leh programme Election Commission of India in a ruahhman thar chu a tarlang a. Pre Revision activities tih tur zawng zawng te chu zawh fel vek a nih tawh thu a sawi bawk a ni.
Election Commission of India chuan kum tin Electoral Roll a hming la chuang ve lo te thun thara Roll atanga paih chhuah ngai te paih chhuak turin Roll Revision hi a buatsaih thin a. Kumin Revision ah hian tahrik ni 01.01.2013-a kum 18 tling thar turte chu Electoral Roll a thun thar tur a ni ang.
Revision programme duan lawk ang chuan Draft Electoral Roll hi 1.10.2012-ah tarchhuah tur a ni ang a. Ni 1.10.2012 leh ni 31.10.2012 inkarah dilna (claims) leh sawiselna (objections) te chu thehluh thei a ni ang. Local Council leh VC ten Roll chhiar chhuahna hun leh hming endik hna chu October ni 6 leh ni 9, 2012 ah te an veng theuh ah an buatsaih ang a. Dilna leh sawiselna sawihona hun ‘Special Campaign Dates’ chu October ni 8, ni 15 leh ni 22 ah neih a ni ang. December ni 1, 2012 thleng heng dilna leh sawiselna te chu chinfel tur a ni ang a. Final Electoral Roll chu January ni 5, 2013 ah tarchhuah a ni ang.
Kumin ah hian Polling Booth thar 35 siam belh niin a awm sa 3 nuai bo a ni a, tichuan tunah hian Polling Booth awm zat chu 1063 a ni.
Meeting zawh hian Chief Electoral Officer Pu K Riachho, IAS chuan a Pisa-ah he Special Summary Revision chungchangah Press Conference a nei zui nghal a. Press Conference ah hian print leh electronic media mi te an tel kim hle a ni.
