Thian duhtakte u,
Vawiin, India ram Zalenna Ni ah hian Champhai District mipui zawng zawng te, chibai ka bukin, duhsakna ka hlan a che u.
Helai hmun hi, Independence Day lawmna a ka lo Parade ve tawhna a ni a; he hmun ngeia khuallian a ka lo tel ve thei hi Pathian leh kan khaw mipui te zar a ni. A hmasa berin Pathian hnenah lawmthu ka sawi a ni.
India in Zalenna Ni champha a lawmna ah hian, ram dang awpbehna atanga zalenna sual chhuak tur leh ram ropui ni tura sulsutu, hruaitu hmasa te; ram zalenna leh hmalam hun atana an nunna hlu tak hlantu mi huaisen kal ta te kha zahna chibai i buk ang u.
Vawiin ah hian India in zalenna a neih atangin khawvel ah pawh ram ropui leh thil tithei ber pawlah a inhlangkai ta a. Kan ram ah remna leh muanna a awm theihnan inpumkhatna leh ram hmasawnna kan neih theihnan theihtawp chhuah theuh turin ka chah che u a ni.
He sawrkar hian COVID-19 hripui in min tibuai viau chungin hmasawnna hna tam tak a thawk hman a, hmachhawp thahnem tak a nei bawk a ni. Vawiin, ni lawmawm takah hian India ram hmun dangte ruala Mizoramin ke a pen ve theihna turin leh ram hmasawnna atana Sawrkar hmalakna kawng hrang hrang ah mipui ten Sawrkar tawiawma, theihtawp chhuah theuh turin ka sawm a che u.
Independence Day, hun lawmawm tak kan hman mek lai hian kan beisei loh takin kan thenawm, Manipur State-a kan unau, (Zohnahthlak) te harsatna tawh mek avangin Zohnahthlak mipuite rilru khingbai takin kan awm a. Mi tam takin nunna chanin, chenna In leh lo mai bakah Pathian Biakbuk thlengin halsak an ni a, kan hmeichhia ten rawng taka pawngsual an tawk bawk a ni. Hei hian tlang hrang hranga cheng, Zohnahthlakte min barakhaih a, Sorkar, Kohhran leh tlawmngai pawl hrang hrangte pawhin kan unau, harsatna tawkte tan, theihtawp kan chhuah a, kan tangrual hle a ni. Sorkar pawhin heng kan unau, Manipur-a harsatna tuar mekte tan hian theihtawp a chhuah zel dawn a ni.
Manipur-a kan unaute harsatna tawh bakah hian Myanmar leh Bangladesh tualchhung buaina avanga kan unau harsatna tawkte chhawmdawlna kawngah kan Chief Minister, Pu Zoramthanga kaihhruai, Mizoram Sawrkar chuan theihtawp a chhuah a, “Keiniin kan ei chuan, an ei ang a, a tul chuan kan nghei tlang ang” tiin, kan unau harsatna tawkte tan Sawrkarin hma a la reng a ni.
Department hrang hrang ten theihtawp chhuahin hma an la a, vawiin ah hian an hmalakna sawi vek dawn chuan hun a lak rei dawn a, a ziaka sem a nih tho avangin leh zirlai naupangte kan thahnem avangin thu sei tak sawi hun niin ka hre lova; Chuvangin he hun pawimawh takah hian Champhai District tana Sawrkar hmalakna te leh hmachhawp tlem a zawng ka lo sawi dawn a ni:
1. Mizoram Sawrkar hian kuthnathawktute a ngai pawimawh em em a, hripui COVID-19 kan tawh avangin sorkarin duh angin hna a thawk thei lo chungin, kan dinhmun leh phak ang tawkin SEDP kaltlangin kuthnathawktute leh thalai eizawng turte khaichhuahna turin, Sawrkarin hma a la a, chhungkaw tam tak puih tawh an ni a, puih leh zel na tur pawh buaipui mek a ni. SEDP hnuaiah hian Food and Fruit Processing Plant leh Cold Storage changtlung zawk te dah tum a ni;
2. Environment Forests & Climate Change: Champhai ah Forest Department thuam chak nan Conservator of Forest (Eastern Circle) dah thar a ni a, a Office tur sak mek chu peihfel tep a ni a, favang chho ah hian hawn hman beisei a ni.
Zotlang hmunhlui-a Botanical Garden cheibawl hnathawh pawh kalpui mek zel a ni a, helai hmunah hian Mizorama a hmasa ber Nature Learning Center (NLC) dinna tur lungphum chu June 28, 2023 khan phum ni in, hmalak mek a ni.
NEC sum hmangin Afforestation of Denuded Hills in Champhai District kalpui mek niin, Mualzen-ah Nursery din a ni a, thingphunna turin ram hectare 369-a zauah hma lak a ni.
Nagar Van hnuai ah khawpui chhunga miten boruak tha kan hip theihnan Champhai Zote ramah Urban Forest cheibawl hna cheng Nuai 200 hmangin thawh mek a ni.
Tlangsam rama Animal Rescue Center (Mini Zoo) dinna tura proposal thehluh chu Central-in a pawmpui tawh a, hna bul tan thuai tum a ni.
3. FCS&CA : Fur ruahtui, kawngchhia leh leimin avanga mipui ten Buhfai kan nghei lohna turin Champhai District chhunga Godown tinah buhfai chhekkhawl sa vek a ni a. Mipui te nitin mamawh phuhru turin eirawngbawlna (gas) hnianghnar zawk kan neih theih nan leh lirthei neitu, petrol leh diesel mamawhte tan pawh theihtawp chhuaha hma lak a ni.
4. POLICE: Thalai te nuna tamtak chhan nan Ruihhlo dona kawngah theihtawp chhuahin hma an la nasa a, ruihhlo tam tak manin vawi engngemaw zat chu halral tawh a ni a. Case 220 register tawh in mi 252 an man a, ramdang atanga phalloh thil chi hrang hrang ramsa, silai leh amu leh thildangte manin mipui kan himna turin hma an la zel a ni.
5. HORTICULTURE DEPARTMENT: MIDH hnuai atangin tomato, zikhlum leh dawnfawh thahnem tak thar chhuah a ni a. Horticulture Department leh FOCUS (IFAD) hmalaknain Hnahlan leh Champhai khawpui leh a chhehvel khuaah te Grape thahnem tak tharchhuah a ni bawk.
NEC atangin Passion Fruit Processing Unit bunna tur sum hmuh a nih bakah Aieng herna khawl pawh bun tura hma lak mek a ni a, hei hian kuthnathawktute tan hlawkna a thlen ngei kan beisei.
Horticulture Department a hma a ADHO hova awm thin pawh DHO ah dah chhoh niin, tun ah hian DHO hovin an awm mek a ni.
Champhai District ah hian Mizorama a awm chhun Grape Winery pahnih kan nei a. Champhai Grape Grower Society leh Hnahlan Grape Grower & Processing Cooperative Society te chuan RR Sales Cooperation nen MOU tha tak an sign a. Hei hian grape chingtute tan hmasawnna nasa tak a rawn thlen beisei a ni.
6. POWER & ELECTRICTY DEPARTMENT: Champhai District in power supply hnianghnar zawk kan neih theih nan Champhai District power Supply pek chhuahna Keifangtlang 132 KV sub-station a 12.5 MVA Power Transformer chu kan khawp kham loh avangin Power Transformer dang 12.5 MVA bun belh a ni.
7. SCHOOL EDUCATION: Kum 2022-23 FY chhungin Samagra Shiksha hnuaiah school hrang hrang tan hmasawnna hna tam tak thawh sak an ni a.
Zirtirtu in daih lohna phuhru turin sorkarin zirtirtu thahnem tak a la a. Hemi hnu hian School tam tak tan zirtirtu indaih lohna phuhru turin SEDP hnuai ah zirtirtu engemaw zat lak an ni bawk a ni.
8. FISHERIES: PMMSY hnuaiah Fish Farmer 114 te hnenah Buh leh Sangha khawi pawlh (Paddy-cum-fish farming) tan tanpuina Rs. 6,000 /- theuh pek a ni a.
Mizoram Sorkar Flagship Programme, SEDP hnuaiah Kum 2022-23 chhung hian Sangha Dil tanpuina mi 280 hnenah Rs. 50,000 /- theuh pek a ni.
9. COMMERCE & INDUSTRIES: SEDP 1st Phase hnuaiah chhungkaw 730 tan First and Second instalment cheng nuai 365 pek chhuah tawh a ni a.
Champhai hi Sumdawnna hmun pui a ni a, ramri sumdawnna mumal zawka kalpui a nih theihnan Land Custom Station pawh, cheng nuai 1500 chuang senga chei thar mek a ni.
Zokhawthar kaltlanga insumdawn tawnna kawng pawimawh tak Melbuk leh Zokhawthar inkar kawng hlui chei that a ni a, kawng thar World Bank road siam thatnan cheng nuai 1350 sanction niin tunah hian hna tan tura hmalak mek a ni.
10. PWD: Champhai kawng hi a lunin motor lian leh te a tlan tam hle a; chuvangin Seling leh Champhai inkar kawng hi kawng tha zawk leh tlan nuam, hun rei lo zawk hmanga kan zin theih nan Double Lane siam hna thawh mek a ni.
11. HEALTH & FAMILY WELFARE : April, 2023 khan Champhai District Hospital-a Trauma Building, ICU, Dialyses, SNCU, RT-PCR, PICU, Bungzung PHC leh Farkawn PHC te hawn a ni a. Nursing School pawh tun atanga hun rei lote ah function hman tum a ni.
Critical Care Block chu cheng Vaibelchhe 20 hmanga sak tan mek a ni.
Urban PHC, Champhai Vengthar ram chu July thla tawpa Cabinet Meeting in a lo pawm tawh angin, Ni 7.8.2023 khan School Education Department chuan Health & Family Welfare Department kutah a hlan fel bawk a ni.
Hei bak ah hian Health Sub-Centre Venglai a mi chu sak thar turin peih fel tawh a ni a, sak zawh thuai beisei a ni. Champhai District chhunga Sub-Centre zawng zawng te chu Health & Wellness Centre-a hlankai vek a ni a. Sub-Centre awm lohna khua zawng zawngah leh khawpui chhung veng hrang hrangah Health Clinic dah a ni.
12. TRANSPORT DEPARTMENT: Champhai DTO Office Building thar sak mek ani a, hawn theih thuai beisei a ni.
Mizoram puma, lirthei neitu, harsatna tawkte dinhmun hriat thiam puiin, lirthei leh driving licence nei a hun taka fee/chhiah pe thei lo te tana penalty, a pung tel lova chhiah ba pekna hun Khawngaihna Hun (Grace Period) chu Mizoram sawrkar chuan Ni 16, August 2023 atanga December Ni 31, 2023 thleng a hawng a ni.
Mizoram hian ei leh bar leh mamawhte lakluhna kawng khat chauh kan neia, chu chu Silchar atanga Vairengte lam khu a ni. Leimin leh buaina hrang hrang avangin mipui ten harsatna kan tawk fo thin a. Hemi tiziaawm tur hian Mizoram Sawrkar chuan Inland Water Transport hmangin kan lui dung hmang tangkai turin hma a la a, tun ah hian Khawthlangtuipui atanga Bangladesh nen inkalpawh nan leh bungraw phurh theih nan hma lak a ni a, Tender chhuah fel tawh niin a thawktu tur pawh thlan fel tawh a ni a, hna thawh tan thuai tum a ni.
13. PHED CHAMPHAI WATSAN DIVISION: Champhai District a khaw 13 te tan in tina tui herh hawn theihna (Functional Household Tap Connection) thawh zawh tawh a ni.
Dam reservoir and Recreation Centre Keilungliah ah siam a ni a, hei hi Champhai tan hma sawnna ropui tak a ni.
14. Tourism Department chuan Swadesh Darshan 2.0 Scheme hnuaiah kawng hrang hrangin hma a la mek a. Tlangsam ah Cultural & Heritage Tourism tih hmasawnna turin hma lak tum a ni a, Champhai Destination hnuaia Main Hub tura buatsaih mek a ni. Vangchhia, Farkawn, Vaphai leh Dungtlang te pawh cultural tourism tih hmasawnna turah hian an tel dawn a. Champhai Destination hnuaiah cultural tourism tih hmasawnna tur atan hian Ministry of Tourism atangin cheng nuai 8000 chuang hmuh beisei a ni. Ministry of Tourism in Champhai destination hi Tourism hmasawn nan a rawn thlang a. Heng hmalakna hrang hrangte hi Ministry of Tourism in a pawmpui turin thehluh fel tawh a ni.
15. LAW & JUDICIAL : Mizoram ah Judicial district pahnih kan neih thin chu Mizoram sawrkar leh Guwahati High Court in Judicial District thar Champhai ah a hawng a, tunah hian District Judge puitlingin Champhai Judicial District hi a thut mek a ni.
Champhai District Court sakna tur pawh buaipui mek niin Tender chhuah mai theih turin hma chak taka lak mek a ni.
16. Establishment of Zomi Cultural Centre at Champhai He project hi NEC atangin cheng nuai 478.69 hmanga sak tura hmalak a ni a. Tunah hian a bul tanna turin lei laih hna tan a ni.
17. Construction of Auditorium at Bethel Veng, Champhai : He project hi Mizoram sawrkarin ngaipawimawhin NEC fund turin a chhawpchhuak a. Project hi Rs 1443.35 lakh man niin, NEC approval Committee pawhin a remti tawh a. Tunah hian NEC guideline thar a awm dawn avangin a thar zulzuia sanction nghah mek a ni.
Ka thu tlangkawmna atan chuan, Parade contingent zawng zawngte chungah lawmthu ka sawi a, vawiin a zirlai leh mipui lo kal khawmte, NGO, Kohhran leh Champhai mipuite chungah sawrkar in thlawpna leh rinna innghah ngam avangin lawmthu ka sawi tak meuh meuh a ni. Mizoram hi hmasawnna kawng zawh turin kan Chief Minister zahawm tak Pu Zoramthanga kaihhruaina hnuaiah a inpuahchah mek zel a; Champhai District pawhin hmasawnna hrang hrang a neiin, hmachhawp pawh tam tak kan nei a ni.
Mahniin ngaihtuah theuh ila, Champhai District leh kan Zoram ngei pawh hi tuna miten, kan hriat phak chinah pawh hian Pathian zarah hmasawnna nasa tak kan hmu tawh a, Zoram hian hmabak hi a eng hle a ni.
State dangte entawntlaka zirna kawngahte, ralmuanna kawngahte, khawtlang nun nuam tak dinna kawngahte, hriselna kawngahte hma kan sawn theihna turin Sawrkar hmalaknate mipuiten min tawiawm turin ka sawm che u a ni. Lungrual takin hmalam kan pan theihna turin, he sawrkar leh keima mimal tak tan pawh in tawngtaipuina ka ngen a ni.
Kan ram tan theih tawp i chhuah zel ang u.
Ka lawm e.
