Vawiin chawhma dar 11:00AM khan Sport Department changtu Minister Pu Zodintluanga chuan Rs.144,76,530/- senga sak Lunglei LDSC ground No - II a Sport Training Centre cum SAI Extension Centre Multi Gymnasium Hall, Sports Hostel, Basket Ball Court, Tennis Court leh Volley Ball Court te awmna chu a hawng a. Technical report a tarlan ang chuan Basket Ball Court 30x18 metre Fibre board hmanna siam nan Rs. 7,41,100/-, Cemented tennis Court 40x20 metre siamna Rs.10,54,380/-, Cemented Volley Ball siam nan Rs.3,91,300/- leh court te hungna atan Rs.19,88,150/- sen a ni.

Minister chuan Chief Minister kaihhruaina hnuaiah kum reilote chhungin Mizo thalai ten khelmual tha leh infiamna hmun changtlung zawkte chhawr tangkaiin hlawhtlinna nasa tak an hmuh bakah Mizoram leh India an tihmingtha hle a ni, a ti a. Mizoram chuan Vision 2016 kan nei a, chu chu 2016 olympic a Mizo thalaite a tam thei ang ber in India aiawha infiamna mual a an tel ve theihna tur a ni, a ti a. Vision 2016 a Mizoram a hlawhtlin phawt chuan India Vision 2020 ah chuan Mizoram chu hlawkna lian ber ber huikhawm theitu tur kan ni a ni a ti. Minister chuan Aizawl ah chauh hmalak a nih loh thu sawiin District hrang hrangah Sport lama hlawhtlinna rahbi thar a awm theih nan khelmual tha leh infiamna hmun tha siam mek zel a ni a ti a. Lunglei, Serkawn ah Stadium puitling Cheng Vaibelchhe 22 senga sakna tur project pawh a puitling thawkhat tawh a, sanction chiah nghah a nih tawh thu a sawi a. Lunglei ah tho cheng Vaibelchhe 4.95 senga sak tum Multi Gymnasium project pawh buaipui mek a ni a ti. Tun hnaiah Mizo thalai tam tak ruihlo vanga nun chan an awm chu a pawi tak zet a, infiamna tuipui mite zingah hetiang hi a thleng ve thei lo a ni a ti.

Sports Training Centre cum SAI Centre hawnna programme hi Pu R. Lalvena, IAS, Secretary, Sport Department in kaihruaiin Pu Lalzirmawia ,Director, Sports Department leh SAI Official ten thusawina hun an hman bakah Boxing leh Taekwondo zirlai ten Demonstration hmuhnawm tak an rawn chhawpchhuak bawk a ni. Vawiina lam zinga mi Sports Hostel ah hian naupang 40 an awm thei dawn a, tun dinhmun ah Lunglei District ah SAI senso in naupang 30 hrual mek an nih thu tarlan a ni bawk.