12th Five Year Plan (2012-2017) atan leh 2013-14 Fianancial Year bik atana National Bank for Agriculture and Rural Development (NABARD) Mizoram Regional Office, Bawngkawn, Aizawl ina a buatsaih ‘State Credit Seminar 2013’ chu vawiin khan Chief Minister Pu Lal Thanhawla’n Zarkawta Hotel Regency Conference Roomah a hawng.

Chief Minister hian 12th Plan atana buatsaih State Focus Paper 2013-14 tih lehkhabu a tlangzarh hmasa a. Seminar hawnna thuchah a sawiah Pu Lal Thanhawla chuan Mizoram hmasawnna tura NABARD hmalakna tam tham tak hi a chhuanawm hle a ni a ti a Agriculture leh a kaihhnawih sectora hmasawnna ruangam pawh commercial bank dangte nen an thawh hlawk hle a ni ti a. Lunglei Districta District Development Manager’s Office a din chu a lawmawm a, hei hian nasa takin self help group leh farmers club ten a hlawkpui dawn a ni a ti.

NABARD Consultancy Servicesin sorkar flagship programme NLUP vil leh endik hna a thawhna hian a hlawhtlinna turah pawimawhna thui tak a neih ngei a beisei awm a ni a ti a. Seminarin a tum ber, hmasawnna ziktluak a awmna tura thingtlanga hmasawnna ruhrel siam chu Mizoramin kan hlawkpui ngei a rinawm a ni a ti. Chief Minister chuan seminara sawiho atana a ngaihpawimawh thenkhat a sawiin, Kuthnathawktu loneimi te tana agricultural credit tam zawk siam sakin, hei hi tlangram loneih bansanna kawnga pawimawh tak a ni a ti a.Chubakah NLUP hlawhtlinna turah bank te leh NLUP Implementing line department te thawhhona boruak tha a siam theih thu a sawi a. Priority sector hnuaiah Credit Deposit ratio tih tam tul a tih thu te, NABARD in central sorkar hnuaia credit linked subsidy kalpui chu tha a tih thu sawilangin,nasa zawka vawk vulh anih theih nan AH&Vety in bank loan hmanga vawk vulhtu tur sponsor tul a tih thu te a sawi bawk a.Hengte bakah micro credit, kisan credit card te, puantah lam tih uar te, thingtlang loneimi te tana an mamawh zat sum puk tir te leh hmasawnna ruhrel, kawngpui, power, leh a dang tam tak siam te chu ngaihpawimawha nei turin a chah a ni.

12th Five Year Plan chhunga infrastructure project ngaihpawimawh zual bik 41 thlan a ni a. Heng project te thawh nan hia Rs.545.25 Crore mamawh ani dawn a, hei hi NABARD chuan Rural Infrastructure Development Fund hnuaiah a sanction thei dawn a ni.

Vawiina Seminar buatsaihna chhan ber chu Mizoram chhunga Priority Sector hnuaia credit potential a taka kalpui anih theih nana kal dan tur mi pawimawh hrang hrang te sawihona a ni ber a ni.

Seminar hawnna inkhawm hi NABARD Mizoram Regional Office a General Manager Pu R.K.Das an a kaihruaiin, Mizoramah commercial bank 20 a awm thu a tarlang a. Mizoram sorkar mi pawimawh Pu Lalkhama, Vice Chairman, State Planning Board, Pu P.L.Thanga leh Pu Haukhum Hauzel, Member Secretary ve ve, State Planning Board te an tel bawk a ni.