2670/2022-2023
Dated Aizawl the 15th November 2022: Tukin zing khan Sports Minister Pu Robert Romawia Royte chuan Chhinga Veng, Saron Veng leh Tuithiang Veng inkalpawhna lei Lalat Bridge a hawng.

He Lei hawnna pual inkhawm tawi buatsaihah hian Bialtu MLA leh Minister ni bawk Pu Robert Romawia Royte chuan Lei dawh a puitlinna chhan chu Pathian vang a nih thu sawiin, Lei siam a nih theihna atana ram petute Pu Lianhrima, Dawrpui te chhung, Pu Thanzuala leh Pu Lalawmpuia Saron Vengte chungah lawmthu a sawi. Bialtu Minister chuan he Lei leh a kaihhnawih hnathawh nan ni 8.3.2019-ah Finance Minister leh CM ni bawk Pu Zoramthanga hmalaknain Rs 586.36 lakh approved a ni a, Expenditure sanction erawh Rs 200 Lakh a ni a ti a. Rs 200 lakh-in Lei chin tha taka zawh a ni a, a bak sum la awm hi a panna kawng leh thil dang tula hmang tangkai turin PWD hotute a ngen a ni.

Bialtu MLA Pu Robert Romawia Royte chuan Saron Veng kaltlanga kham chhengchhe tak kaltlanga Lei tha tak hmanga veng inri reng ni si, ke leh motor pawha inkalpawhna awm lo; Chhinga Veng leh Tuithiang Veng inkalpawhna hawn a nih tak avangin bial chhung inpumkhat bakah Aizawl chhuahlam pumpui traffic jam pawhin a zia phah a rin thu a sawi a.

He lei puitlin a nih theih nan a pawimawh tak tak Saron Veng, Chhinga Veng leh Tuithiang Veng Local Council leh khawtlang leh kohhrante chungah lawmthu a sawi.

Pu Robert Romawia Royte chuan Lei chu Mizo kutchhuak a nih thu sawiin a design-tute, mistiri leh helper thlengin Mizo vek an ni chu lawmawm a tih thu a sawi a, lei dawh nana a engineer te leh contractor pawimawhzia sawiin lei chu uluk taka siam niin cube test an nei thlap zel chu lawmawm a tih thu a sawi.

Minister chuan Lalat Bridge hawn tak chu Saron Veng, Chhinga Veng leh Tuithiang Veng mai ni lo, Aizawl chhuahlam Veng tam tak tan inkawlpawhna kawng a hawn thu a sawi a, Bazar Bungkawn Traffic Jam pawh a tihziaawm a rin thu a sawi bawk.

Minister Pu Roberta Romawia Royte chuan Aizawl E-II bial chhungah tun hnaiah lei 2 hawn thar a ni a, hei bakah hian Chhinga Venga Bethany Veng luhna tur Lei dawh tan tum a ni a, Chite Lui kan nan Lei pahnih siam a nih dawn thu a sawi bawk.

Lalat Bridge hi Saron Veng, Tuithiang Veng leh Chhinga Veng inkalpawhna laia awm niin, RCC framed structure-a siam a ni. State Fund atanga sak niin Expenditure Sanction Amount hi Rs 200 Lakh a ni. Lei sei zawng hi metre 76 niin a zau zawng hi metre 5.50 a nih thu Er Lalbiaksangi EE PWD-in Technical Report pein a sawi.

He hunah hian Saron Veng LC Chairman Pu C.Chuauhluna, Tuithiang Veng LC Chairman Pu R.Lalthlamuana leh Chhinga Veng LC Chairman Pu H.Ramzawnga te pawhin kum rei tak tihtlang theih loh thin chu tuna bialtu Minister hmalakna a siam zawh a ni thei chu ropui an tih thu an sawi hlawm a ni.

He Lei hawnna puala inkhawm tawi buatsaihah hian Sport Minister bakah Mamit bialtu MLA Er H.Lalzirliana, NGOs hruaitute leh Local Council Members te an tel a ni.