1868/2022-2023
Dated Aizawl 9.9.2022: Vawiin khan Sport Minister Pu Robert Romawia Royte chuan Phunchawnga Operation Kingdom Ministry (OKM Home), ruihhlo ngaite enkawlna hmuna Annual Sports hun kharna Khuallian niin hun a hmanpui.

Pu Robert Romawia Royte chuan thusawiin OKM Home-a Mizo thalai 300 velte chu he Home-a an awmna chhan mahni leh mahni inzawta inngaihtuah chiang turin a fuih a. Thuawihna, tumruhna leh tuarchhelna nen an Course hmang zova anmahni hmangaihtu an nu leh pa, chhungkua, khawtlang leh Kohhran hmangaih leta mi tangkai ni turin a chah a. Harsatna, tawrhna leh retheihna tuar chhuakte hi mi hlawhtling an ni thin a. Chutiang ni tura rilru siama an zirlai zir zova he Home chhuahsan tum theuh turin a fuih.

Sports Minister chuan Mizoram sorkar hian thalai ruihhloa harsatna nei leh sual bawiha tangte chhanchhuah hi a ngai pawimawh a, mahni mihringpuite hmangaiha humsual daite chhanchhuah duhtu Chief Minister kan nei hi kan vannei hle a ni a ti.

Pu Robert Romawia Royte chuan ruihhlo ngaite enkawlna Home hi India ram hmun dang aia Mizoramah a tam thu sawiin, a veiawm a tih thu a sawi a. Ruihhlo vanga home dinte titlema khar hial thei tura ruihhlo umbo hun hi a nghahhlelh awm takzet a ni a ti. Minister hian Home-a thalai rual mi 300 te infiam nan leh intihhlim nan Table Tennis Board leh infiamna hmanraw hrang hrang bakah buhfai bag 100 leh an ruaithehna tur bawngsa a pe a ni.

Operation Kingdom Ministry hi kum 2014 khan Chhinga Vengah Ruatpuii leh a thiante pathumin dinin bul an tan a. Tunah chuan anmahni pualin Phunchawngah Home changtlung tak rawngbawlna an kalpui mek a. Tunah hian Zirlai 270 vel leh thawktu 30 vel an awm mek a. Home-a awmte hi Syllabus 21 hmangin Bible thla 7 Course zirtir thin an ni a. Bible course hlawhtling taka zir chhuakten Home an chhuahsan a, Bible course zir chhuak lo te erawh chhuahtir lovin zirtir nawn leh an ni thin. He Home-ah hian awm man lak a ni lo.