Sports & Youth Services Minister Pu Zodintluanga chuan Hnahthial Playground sakna hmun tur en fel turin lehlangin Hnahthial a tlawh a, Rs. 2.5 crore senga Football Playground changtlung tak sak anih theihna tur hmun remchang awm te a enkual a ni.

Minister hian Hnahthial Electric Veng Field a hmunah a tlawh a, hemi hnu hian Rallang Tlanga Hnahthial College ram hmun awl chu a hmunah a tlawh a, Serchhip Bazar Veng a Hnahthial Block Sporting Committee (HBSC) Field Number 1 leh Chanmari venga HBSC Field Number 2 te pawh a hmunah tlawh lehin khawi hmun ber hi nge International Standard Playground sak na atana tha ang tih a enkual a ni. Minister hian heng field hrang hrangte a tlawh zawh hnu hian Hnahthial PWD IB ah Hnahthial khawchhunga YMA Branch hrang hrang aiawhte leh Hnahthial Zone Football Association aiawhte a kawm a, Field hmun tur atana tha tur hmun dang a tlawh hman tak lohte pawh YMA hruaitute leh sawrkar official ten lo endik a a rang lama report thehlut turin a chah a ni.

Minister chuan YMA hruaitute chu playground sakna hmun tur thu ah buai lo tura chahin, Sawrkar duh dan ber chu Hnahthial hian field tha leh changtlung, thangtharte tana chhenfakawm tak nei se tih hi a duh ber anih thu a sawi a, hemi atana tha ber tur hian ruahmanna siam anih tur thu leh sawrkar thutlukna zah thiam turin a chah a, Playground chu veng pakhat ta nilova Hnahthial khaw pumpui ta tur anih thu a sawi bawk a ni.

Minister hi Hnahthial PWD IB ah Hnahthial khawchhunga Sawrkar Department hrang hrang hotute leh Tlawmngai Pawl hrang hrang hruaituten an lo hmuak a, hetah hian thu sawiin Minister chuan Hnahthial khawtlang tihchangtlun na tur hian UD&PA Department chuan cheng vaibelchhe sarih (7 crore) a ruahman thu leh national tender tihchhuah anih tawh thu te, a thawktu tur pawh reilote ah thlan fel an nih a hna thawh tan thuai anih tur thu a sawi a, hetah hian Community Hall changtlung tak Rs. 2.1 crore senga sak tur pawh a tel thu tarlangin, Hnahthial khaw mipuiten an chhawr tangkai theih tur thil tam tak sawrkarin a ruahman thu a sawi bawk.

Minister chuan Hnahthial chu Sports lamah pawh Mizorama sulsutu, infrastructure tha awm lo chung pawh a Mizoram mai nilo India ram tihmingtha theitu infiammi engemaw zat lo chher chhuak tawh tu an nih thu sawiin sawrkar pawhin a ngaihven hle thu a sawi a, mahni veng bil nilova, Hnahthial khaw pumpui huap hmasawnna tur atana ngaihtuahna seng turin kalkhawmte chu a chah a ni.

Minister hi Pu R.Lalvena, Secretary, Sports & Youth Services, Pu Laltlanthanga, Sports Promotion Officer, Mizoram State Sports Council, Department Engineer te bakah MJA member thahnemtakin an tawiawm a ni.