Zan khat riaka lokal Sports Authority of Arunachal team te chuan nimin khan Aizawl an lo thleng a. Mizoram State Sports Council official-te nen inkawmna hun hmangin Aizawl chhunga infiamna hmun pawimawh tak takte fankualpui an ni.

Pu C.Laltlanthanga, Secretary, MSSC chuan R.Dengthuama Multipurpose Hall sak nan Urban Sports Infrastructure Scheme (USIS) atangin Rs.6 crore an hmuh thu leh State sum (Special Plan Assistance) Rs.1.5 crore nen a vaiin Rs.7.5 crore hmanga sak a nih thu a sawi a, Rs.13 crore senga sak Hawla Indoor Stadium leh RG Stadium sak mek fanpui an ni bawk a, heng hmun hma pahnihte hi Mizoram PWD sak a ni ve thung.

Mizorama sports hmasawn dan leh hmasawnna tura ruhrel duan mek kalpui dante hrilh an ni a, sports hmun hma hrang hrang - Rajiv Gandhi Stadium, Mualpui, R.Dengthuama Multipurpose Indoor Stadium, Mualpui leh Hawla Indoor Stadium, Republic Vengthlang te fanpui an ni.

Sports Authority of Arunachal Pradesh Chairman Bamang Tago chuan Mizoram Sports hmasawnna ropui tak chu an state tan pawha entawn tlak a nih thu leh a bikin R.Dengthuama Multipurpose Hall chu ropui a tih thu te, hnathawh a that thu leh sum pawh a nihna tur ang takin an hmang ni a a ngaih thu a sawi. Sports-a Mizoram hmasawn dan chu state dang tan entawntlak a ni tiin, tlangram hmun rem lovah infrustructure ropui tak tak hmuh tur a awm te, sang leh zualah hengte hian Mizoram a dintir ngei a beisei thu leh India ram pum huapah pawh Mizoram chu infiammi nei tha leh thawhhlawk, hmasawn ber pakhat a nih thu a sawi bawk a ni.

Sports Authority of Arunachal Pradesh hi Bamang Tago - Chairman chuan a rawn ho a, team member te chu- Gechi Doke - Vice Chairman, Tadar Appa - Director of Sports, Govt. of Arunachal, Gumnya Karbak - Member Secretary, SAA, Karbia Dodum- Asst. Director, Youth Affairs, Govt.of Arunachal Pradesh te an ni. Vawiin khan Aizawl chhuahsanin Telengana State an tlawh leh ang.

Attachment

  • Loading attachment...