State Disaster Management Authority meeting  pawimawh tak vawiin khan  Chief Minister  Pu Lal Thanhawla hovin  Chief Minister Office ah neih a ni a. Meeting-ah hian UD&PA Minister Pu Zodintluanga, Health Minister Pu Lal Thanzara; Chief Secretary Pu Lalmalsawma leh DM&R Secretary Pu Zothankhuma; Director, DM&R Pu Lalpeksanga; Member, SDMA Pu Dominic Lalhmangaiha leh official member te an tel a ni. 

Meeting kaihruaitu Pu Lal Thanhawla chuan Mizoram hi lirnghing area a awm kan ni a, mithiamte sawihmangah Mizoram dinhmun hi a him lo hle a. Tunhnai lawkah thenawm state Manipur leh Myanmar ramah te lirnghing nasa hriat a ni a. Mi ram te chu phaizawl hmun a niin, keini chu tlangram thenawmte In nena  inhnaih em em a in sa kan ni a, chuvang chuan eng angin nge hma kan lak ang tih chu sawiho a tul in a pawimawh hle a ni, a ti a. 

Tuna kan ram mipui te ber atanga lian ber te innghahna chu silpauline leh tarpaulin a ni tlangpui in, heng hmanrua te hi chu rei daih tur an ni lovin engemaw chen a lo veng him ve thei a ni chauh a. Chuvang chuan chhiatna hrang hrang leimin, lirnghing leh a dangte lo thlen hma leh a lo thlen palh pawha lo invennan leh lo hriat atana mithiamten an sawi leh an tlangaupui (awareness) hi ngaihthla liam mai lova a taka zawm a tul thu Chief Minister chuan a sawi bawk. 

Meeting hmasa lama thu dah leh hmalak chhoh dante vawiin hian thlirho a, sawizui nghal a ni a. DM&R Department a thawktu indaih lohna leh hun rei tak a nghet loa lo thawk tawh dah ngheh dan tur te sawiho a niin Central lam atanga sum lokal a tul anga hman theih tura chak zawka umzui nise tih te relin agenda 9 chhawpchhuah leh Aizawl khawpui leh a chhehvela leimin leh kawng chhe zual ngaihpawimawh hmasak tur chi te sawi zui ho a nghal a ni bawk.