Mizoram State Olympic Association (MSOA) buatsaih Seminar on Sports Medicine, Aijal Club-a vawiina neihah MSOA President Pu Lal Thanhawla, Chief Minister chuan hmanpuiin seminar hi a kaihruai.

Kalkhawmte lawmna thu a sawiah, Chief Minister chuan Mizote sports chanchina la awm ngailo leh hriat la hlawh lo tak, Sports Medicine tih seminar buatsaih a ni chu a lawmawm hle a, hetiang lama mithiam kan nei chho ve zel hi a vanneihthlak hle a ni a ti a. Sports lama kan than chhoh mek zel rual hian a inenkawlna lamah hma kan sawn ve zel a pawimawh a ni a ti. Infiammi ten thiamna leh theihna, fitness hi a kalkawp tlat ani tih an hriat a tul tiin, ei leh inah zawm tur leh zawm loh tur hriat a pawimawh a. Sports administrator-te pawh thalaite entawntlaka nun kaihhruai a tul a ni a ti.

Chief Minister chuan Olympic ah thenawm state Manipur leh Nagaland te chuan Olympian an nei tawh a, chuvangin tuna kan au-hla tur chu olympic lehah olympian tur infiammi mi pali panga tal kan thehchhuak tur a ni a ti a. Contact sports mai nilo, discipline dangah pawh Mizote hi kan zeilohna a awm bik lo a ni a ti. A pawimawh ber chu a hun taka zirtirna leh training lak hi a ni a ti a. Hmasawnna ruhrelte leh sports lam te hi private leh corporation te nen pawha thawhho theih a ni a ti. Tuna seminar neih hi duh tawk mai lovin, district dangahte pawh la chhunzawm zel ni thei se a duhthu a sawi bawk a ni.

Sports medidcine lama mithiam Dr.Lalzarmawia Khiangte chuan sports medicine tih hian zau tak a huam thu sawiin, infiamnaa inhliamte enkawl ringawt nilovin, hliam tawrh hnua tha taka infiamna an chhunzawm theihna tura an mamawh anga enkawl chhohte, rilru lam te, taksa hnathawh dan endik reng te leh a dang thahnem tak nutrition, psychology, pre participation physical evaluation te, fitness assessment, training, anthropometry, sports physiology, biomechnics, sports biochemistry leh thil dang dangte a huam a ni a ti.

Seminar ah hian Sports Association hrang hrang atanga hruaitute an tel a. MSOA Secretary General Pu Zoliana Royte in report a pe bawk a ni.