Pu Zodintluanga chuan India ram chu hnam ze hrang, sakhaw biak hrang leh pianphung inang lo tak tak awm khawmna ram a nih avangin hei hi kan chakna hnar a ni zawk a ti a. Nakin hnu a kan thlahte hmakhua leh hamthatna tur chu tunah hian kan kutah a awm a ni tiin, chumi atana theihtawp chhuaha inhlan thar turin kalkhawmte a sawm hmasa a.
Mizoram tan infiamna kawnga hmasawnna turin sawrkar laipui chuan namen lovin chhawmdawlna a pek tawh dan sawiin mamawh erawh tam tak kan la neih thu a tarlang a. Mizoram chu state tenau a nih avangin mamawh leh hlen tur tam tak a nei a, chungte chu sum indaih lohna avangin amah maia a tih puitlin theih loh a nih avangin sawrkar laipuia an mamawh thlen chu ngaih pawimawh sak turin Sports Minister a ngen a. An mamawh te hrereng a naupangin a pa hnena thil a ngen anga ngai turin a sawm a ni.
Mizoram la hmelhriat lote hnenah Mizoram chuan Sports lama ruangam liantham engmah sawi tur a la nei lo nachungin infiamna peng hrang hrangahte erawh chuan ram pum tan hming a chher ve nual tawh a ni Pu Zodintluanga chuan a ti a. Chunga hming a chherna te chu a tlangpui thuin a tarlang zui nghal a. Naupang te an tette lai atanga sports lama kaihhruai chu thil tul ni a hria in ‘Catch Them Young’ policy chu Ministry a lak atanga tan nghal a nih thu a sawi a. Hei hi tluang taka kalpui a nih zel chuan hun reilote chhungin a hlawhtlinna hmuh a beiseiawm a ni a ti.
State danga a Minister puite hnenah chuan Mizoram Sports Minister chuan Mizoram chu talent fuankhawmna ram a ni tiin infiamna khawvela hlawhtlinna hrang hrang a sawi chhuak a. Mizoramah football field tha FIFA in a pawm ang pakhat mah kan la nei lo nachungin football khelthiam erawh thahnem tak kan chherchhuak tawh a ni, a ti a. India ram football club langsar tak takah te chuan Mizo tlangval hmel hmuh tur an awm zel tawh avangin India football chu Mizo tel lo chuan a kim thei tawh lo a ni, a ti. Tunhnai kum kalta ah te pawh khan Mizo football khel mi 30 zet te chuan training na mumal leh infiamna hmunhma nei tha lo chung pawha an thiamzia an lantirte chu thil mak a tling zawk hial a. Ramchhung football lam thuneitute pawhin Mizote zingah football khelthiam tur an rawn veh chamchi reng tawh a. Chuvangin infiamna hmunhma changtlung zawk nei thei phei ila chu engtiang takin nge football ah hian kan thlen san theih ang tih chu ngaihtuah tham a ni a ti.
Minister chuan Sports Authority of India bultumin Special Area Games (SAG) hnuaiah infiamna hmunhma 1989 kha Aizawl ah an siam thu a tarlang bawk a. Hetah hian Boxing, Judo, Taekwondo, Weighlifting leh Karate zirtir niin Mizo thalai tam takin an chhawr tangkai a, heta zirchhuak Mizo boxer Zoramthanga chuan khawvel pum huap 6th MRF Boxing, Bombay a neihah 1990 khan Light Fly Weight-ah Bronze Medal a la tawh a. Jenny R.Lalremliani pawhin 2007 khan 4th World Women Boxing Championship ah khan Gold Medal a hlawh tawh bawk.
Thalkah lamah pawh Mizo naupangte zingah a thiam tur rawn zawngin thingtlang naupang pakhat Lalremsanga chu tuaihriam zui a ni ta a. Chutiang tak chuan Lalremsanga chu thalkap hlawhtling tak ni chhovin Indian ram aiawh a Olympic inelna thleng pha a ni ta a ni. Olympic lo awm leh turah pawh India Archery Team hruaitu atan ruat a ni nghe nghe. Hemi chungchangah hian Pu Zodintluanga chuan Mizo naupang, thiam tak tak zawnchhuah tur tam tak an la awm thu sawiin theihtawp chhuahpuiah kalkhawmte chu a sawm a ni.
Hockey lam pawh sawilangin Mizoram Sports Minister chuan Women Hockey Academy, 2004 khan Thenzawl ah din fel a nih thu a sawi a. Hetah hian Mizo nula Hockey khel thiamte chu training pek an nih dante, India aiawha Japan ah Mizo nula pali an tel tawh thute, U-18 Asia Cup, Shanghai, China a neih ah Mizo nula pahnih an tel thute a tarlang a. Thil chhinchhiah tlak tak pakhat chu Hmeichhe World Cup, USA a neih turah India Senior Team-ah Mizo nula pakhat a tel dawn bawk a ni. Sawi tawh angin Mizoram chuan Sports ruangam changtlung a nei lo chunga hetianga hlawhtlinna namen lo a nei chu phurpui tlak a tling takzet a ni tiin SAI leh Mizoram sawrkar tangkawpin inremna thuthlung siama Women Hockey Academy te hman tur Astroturf phah hna an kalpui mek pawh chu puitlin fel a nih huna a hawnna hun rawn hmang ngei turin Union Sports Minister chu Pu Zodintluanga hian a sawm nghal a ni.
Sports hmunhma changtlung zawk Mizoram in a mamawh zia chu ngai pawimawh tura ngen nawn lehin sawrkar laipui atanga sum hmuh tur la awmte a rang thei ang bera pe chhuak turin Pu Zodintluanga chuan a dil a. Chung zingah chuan Mizoram chhunga project 9 puitlin tur - State Level Sports Complex, Aizawl cheng 568.49 lakhs; Indoor Stadium, Ramhlun cheng 120 lakhs; District Level Sports Complex, Saiha cheng 220.80 lakhs; District Level Sports Complex cheng 220.28 lakhs; District Level Sports Complex, Champhai cheng 209.92; District Level Sports Complex, Kolasib cheng 206.02; District Level Sports Complex, Lawngtlai cheng 158.21 lakhs; District Level Sports Complex, Lunglei cheng 116.61 lakhs leh Outdoor Stadium, Dungtlang cheng 36.12 lakhs te an ni a ti a. Heng zawng zawng atan hian cheng nuai 119.59 chauh sawrkar laipuiin a pe chhuak tawh a, state in a tum ve tur 25% cheng nuai 545.39 chu pekfel a nih thu a sawi lang a. Chuvangin hna kal lai contractor ten an chawlhsan thute sawiin heng sum la hmuh turte hi a hma thei ang bera pe chhunzawm turin Union Sports Minister chu a ngen a ni.
A thusawi tlang kawmin Pu Zodintluanga chuan heng a tarlan takte hi a tlangpui zawr zawr a nih thu leh a kimchanga a buatsaih chu ziakin Union Minister hnenah hian a hlan a. Rampum huap anga infiamna lama India in hma a sawn theih nan leh Mizo thalai talent nei tha tak takte nasa zawka haichhuah an nih theih nan a thu thlen te chu ngai pawimawh tura chahin hetiang hun tha tak a chan theih avanga a lawmthu Mizoram Sports Minister Pu Zodintluanga chuan a sawi.
