3585/2023-2024

Aizawl, the 31st January 2024: Tukin zingkar khan Secretariat Conference Hall, MINECO-ah Sports Minister Pu Lalnghinglova Hmar hovin Khelo India University 2024 Mizoramin February thla chawhnu lama a lo thlen dan tur rel a ni.

Sports Minister Pu Lalnghinglova Hmar chuan National Level Sports promotion program pawimawh tak, Khelo India University 2024 Mizoramin a thlen tur chungchang te a sawi hmasa a. He event liantham tak leh hautak angreng si hi, a huphurh ang zawnga la lovin, chona anga hmachhawn turin department hotute a fuih a. Tun tuma Khelo India University Football hi Mizoramin sports event liantham zawk a dawn leh hun atana inpuahchahna tha tak a ni tih a sawi.

Pu Lalnunhlua, Director, S&YS hnen atangin department hrang hrangte mawhphurhna insem dan te leh thil tul dang te ngaihthlak a ni a. He mi hnuah hian sawihona leh hmalak dan tur rel a ni.

Mizoram chuan Football Segment bikah University hrang hrang Football Team pariat(8) te February 19 atanga 29 a mikhual dawn a. Inkhelhna, thlenna tur leh a kaihhnawih dang te lo buatsaih leh abak mawhphurhna dang te chu sports department leh department dang ten an insem dawn a ni.