Vawiin chawhnu khan Sports and Youth Services (SYS) Minister Pu Zodintluanga hovin a pisa-ah 2017 Women’s Hockey Asia Cup, October 28th atanga November 5th 2017 chhunga, Kakamigahara, Japan-a neih taka hnehna changtu Indian Women’s Hockey Team-a tel Lalremsiami chawimawina hun hman a ni a. He hunah hian SYS Department thawktute, Hockey Mizoram leh Mizoram State Sports Council member-te an tel a. Hockey Mizoram President Pu Hmingdailova Khiangte, MLA  in a hmanpui bawk a ni.

Sports Minister Pu Zodintluanga chuan Mizo nula in International level-a gold medal la a Mizote tihmingthatu a ni chu lawmawm a tih thu a sawi a. Tunkum hian International leh National level-ah medal latu an awm nual a ni tiin hmasawnna hmuh tur a tam hle a ni, a ti a . Sports lama hmasawnna ruhrel kan neihte thalaiten an hman tangkai a ngai a ni tiin thahnemngai taka tuichilh ten hlawhtlinna an hmu chho zel a ni, a ti a. Sports hrang hrangah hmahruaitu hlawhtling tak tak an awm chu thalaite tan chona leh vanneihna a nih thu a tarlang a. Heng mi hlawhtlingte atang hian International level-ah pawh Mizo ten Gold medal kan la thei tawh a ni tih thalaiten kan hriat a pawimawh thu a sawi a. Lalremsiami kalna zel turah duhsakna a hlan nghal a ni.

Lalremsiami hi Kolasib khua niin Sports Authority of India (SAI) Women Hockey Training Centre, Thenzawl chhuak a ni a.  Women’s Asia Cup (Under 18) 2016 Bangkok-a neih takah khan telin Bronze Medal a lo la tawh a. March leh September thla khan Bhopal leh Netherlands-a test match khel tur zingah thlan a ni bawk a. 2017 Women’s Asia Cup-a Indian Women’s Hockey Team-ah telin final match ah China team hnehin nakum lama Women’s World Cup-a khel turin an tling a. 2017 Women’s Asia Cup-a tel tur hian Lalremsiami hi Junior team atangin Senior teamah dah a ni a. Sports Authority of India (SAI) Women Hockey Training Centre, Thenzawl atang hian International Players 7 an awm tawh a ni.

Chawimawina hun hi SYS Addl. Secretary Pu P.S.Sanghluna’n kaihruaiin kalkhawmte lawmna thu a sawi a. Gold Medalist Lalremsiami atangin Competition Report ngaihthlak a ni a. Hockey Mizoram President Pu Hmingdailova Khiangte in thusawina hun a nei a. Chief Coach (SYS) Lalrampari chuan training neih a nih dan leh inbuatsaih dan hrang hrang a sawi a. Minister Pu Zodintluanga’n Lalremsiami hnenah thilpek a hlan nghal bawk a ni.