Mizoram Women’s Hockey Association huaihawtin nimin khan Thenzawla SAI Centre ah  May 17-26, 2015 a 2015-a Ranchi, Jharkhand a National Sub-Junior Girls Hockey Championship a pakhatna dinhmun luahtu Mizoram team-te hlawhtlinna Sports minister Pu Zodintluanga hovin lawm a ni.

Pu Zodintluanga chuan he hunah hian thu sawiin hun engemaw chen Hockey-ah Mizote kan hmingthat hnu in Hockey khelh chakna leh tuina Mizoram pum anga ngaihtuahin a kiam hman a; amaherawhchu Sports & Youth Services Department in theihtawp chhuahin tan a lak thar leh hnu ah reilote chhungin hlawhtlinna kan hmu lehnghal hi a lawmawmin mizo thalaite talent neih that zia a tilang chiang hle a ni a ti a; khawpuiah Hockey Ground a awm that loh avanga duh anga thalaite theihna (potential) haichhuah a harsat thu sawiin Aizawlah Hockey Ground pakhat tal neih anih theih nan hma chak taka lak anih thu leh a hlawhtlinna hmel hmuh thuai a beiseiawm thu a sawi bawk.

Pu Zodintluanga chuan Kawnpuiah mipa tan Hockey Academy leh Astro Turf a awm hnu ah hmasawnna hmuh tur tam tak awm a ni a ti a, Thenzawla Hockey Ground siam mek la zawh fel loh chungchang sawilangin Central PWD te hnathawh a nih avangin an chungah thuneihna State sawrkarin a hranpa in a neilova, zawhfel thuai anih theih nan erawh chak taka nawr a tum tih a sawi a, Sports discipline hrang hrangah awmze nei zawka thalaite talent haichhuah anih theih nan Sports Department, Mizoram State Sports Council leh School Education Department tangkawpin School-Level Sports Festival buatsaih a tum thu a sawi bawk.

He hunah hian Pu Zothankhuma, IAS, Secretary, Sports & Youth services pawhin thusawiin thalai tam tak Sports lama hlawhtlin tumin an kal a, mahse an zavaiin an hlawhtling vek thei lova hei vang hian an lo vanduai palh ta anih pawh a eizawnna kawng dang an dap theih nan skill development training tih tel a pawimawh a ni a ti a, Thenzawla hmeichhe naupang Hockey zira awm te pawh a remchan dan ang anga hetiang lama kawng dap pui a tum thu a sawi bawk a ni.

Pu Zodintluanga hian India rama champion Hockey player te leh anmahni enkawltu Coach leh manager te hi lawmpuina tangkafai, Hockey Stick leh Jersey a hlan theuh a, Hockey Champion lawmna inkhawm hman zawh anih hnu hian Thenzawl Hockey Ground a tlawh a, Hockey ground phuh huhna atana an mamawh submersible pump a pe nghal a, a theih ang ang a a ngaihpawimawh chhunzawm zel tur thu a sawi bawk a ni.

Hockey Champion lawmna inkhawm hi Pi Lalrampari, President, Mizoram Women’s Hockey Association in a kaihruai a; Thenzawl Hockey Association ten champion team chawimawina hun an hmang bawk a, he hun hi Aizawl leh Serchhip atang sawrkar mipawimawh engemaw zatin hmanpuiin tlaiah Champion lawmna ruai an kilho nghal a ni.