Vawiin khan Rengtekawn High School chuan HSLC Exam 2015 a an zirlai hlawhtling te chawimawina hun hmangin Pawl 10 exam bei zirlai zawng zawngte an pass kim vek chu an lawm a. He hun hi Parliamentary Secretary  Pu Joseph Lalhimpuia leh Parliamentary Secretary Pu K Lalrinthanga ten an hmanpui a ni.

Pu Joseph Lalhimpuia chuan zirlai hlawhtling te chu lawmpuina hlanin tunah an hlawhtlinna hi a bul an tanna chauh a ni a, kum 10 hnu ah eng dinhmunah nge an din, khawtlang leh ram tan mi tangkai leh hmantlak an ni em tih te chu an hlawhtlinna tehfung tur a la ni dawn tiin kawng engkimah rinawmna, taimakna, tumruhna leh an nun uluk chunga hma lam  pan turin a fuih a ni. Parliamentary Secretary chuan Zirna hi sikul building ropui ah a innghat lova ni tih kan hriat hi a pawimawh a tiin zirna tha leh tluangtling hi sikul result ah te, zirlai naupang hlawhtlinna ah te leh zirtirtute inpekna leh thawhrimna ah te a innghat zawk thin nia a hriat thu a sawi.

A sawizel naah Parliamentary Secretary chuan zirtirtu ropuina chu hlawh tam emaw, degree leh thiamna sang takah emaw ah te a innghat lem lova an naupangte an zir lai an hrilhfiah thiam tawk em, an naupang chherchhuah te chu khawtlang leh ram tan mi chenfakawm an ni em tih te ah a in nghat zawk a ni, a ti.

Parliamentary Secretary Pu K. Lalrinthanga pawhin Zirna hi mihring hmasawnna atana thil pawimawh ber a nih thusawiin zirlai te chu engtik lai pawhin an zirna ngai pawimawh a, an zirna lamah thahnemngai turin a chah a ni.

Rengtekawn High School hi kum 2004 khan khawtlang mi thahnemngai ten an din a ni a, kum 2008 khan Lumpsum aided ah hlankai a ni. Kumin HSLC Exam ah khan zirlai 23 neiin an vaiin an pass vek a ni. He Sikul atang hian naupang 108 in Matric an passed tawh a, vawi 6 lai 100 percent result an nei tawh bawk a ni.

Vawiin vek khan Parliamentary Secretary Pu Joseph Lalhimpuia chuan Kolasib DIET a tlawh a. Kolasib DIET building sak mek chu a hmun ah a en nghal a. Kolasib DIET building hi cheng nuai 184 senga sak tur niin a sum hi sawrkar laipuiin a tum a, a sakna tur first instalment hi hmuh ni tawhin second instalment pawh a thleng leh tawh a ni.