Vawiin khan Parliamentary Secretary leh Tuirial bialtu MLA Pu Hmingdailova Khiangte chuan Kawnpui a tlawh a, Kawnpui Venglai Bazar building zauh tum chu a Department kaihhnawih thawktu leh khawtlang hruaitute nen an enho a, a hmuna hian hmalak dan tur an sawiho.
He Bazar hi kum 2004 khan Trade & Commerce Deptt. chuan cheng Nuai 5 sengin Road site Market ang chauh-in an sa a; tih len a ngaih avangin kum 2011 ah MP LAD Fund cheng Nuai 3 sengin tih zauh belh a ni a; kum 2013 khan District Development Fund cheng Nuai 2.2 sengin zauh belh leh a ni tawh bawk a. Tunah chuan Bazar awmsa aiin pantu an tam zawk a ni.
He Bazar ah hian mipui an tawt lutuk avang leh thil zuar an tam avangin V/C te chuan Bazar pawn lamah Hulhliap siam chawp-a Sumdawngte awm tir dan tur an ruahman mek a. National Highway nimahse mipuite an him zawk nan No Parking Area pawh anmahni tawkin an siam nghe nghe.
Bazar bul hnai ah hian Larger Agriculture Multipurpose Society (LAMPS) hmun hma tha tak, Kudam atana an hman thin a awm a; chu chu lei sak-in Bazar chu a awmsa aia lian zawkin a sak belh theih niin a hmuna entute hian an ngai a ni.
Hemi hnu hian Pu Hmingdailova Khiangte hian Kawnpui Higher Secondary School a tlawh leh a. Zirtirtute nen inkawmhona hun tha tak neiin zirlai leh sikul dinhmun chungchangte an lo hrilh a, an mamawh leh harsatna chungchangte pawh Parliamentary Secretary hi an hrilh bawk a ni.
Kawnpui Higher Secondary School ah hian zirlai an tam lutuk vanga building sak belh nana khawtlang mipui in an thawhkhawm cheng Nuai 2 belh chhah nan MLA Fund atangin cheng Nuai khat a pe. He School ah hian zirlai 139 an awm mek a. Arts subject zirna niin Subject duh thlan tur 10 a awm a. HSSLC Exam hnuhnung berah 100% an passed a ni.
