Vawiin khan Sports Minister Pu Zodintluanga hovin Mizoram Weightlifting Association hruaitute leh thuthar thehdarhtu ten Minister office-ah hian inkawmna hun an hmang a. Vision Olympic 2016 hmalakna kal zel leh Mizo infiammite zinga hlawhtlinna hmuh chhoh mekte an sawiho a.
Minister Zodintluanga chuan Mizo infiammite tan ram pum huap mai nilo, khawvel pum huapa hming an chher theih nan Sorkarin hma a lakna ten rah a chhuah tan mek thu a sawiin, khawvel huap inelna hrang hrangah Mizo infiammi tel pha an awm zel thu te a tarlang a. Thalaite tan infiamna hmunhma leh hmanraw tha buatsaih a, remchanna siam sak chu Sorkarin a ngaih pawimawh thu sawiin, a hman tangkai leh hlawhtlinna chu mimalah a innghat a ni, a ti a. Heng hmunhma tha neih hma pawha state dangte el pha infiammi nei thin kan ni a, tunah phei chuan infiamna chi hrang hrangah hma kan sawn leh zual a ni, Minister chuan a ti.
Mizoram Weightlifting Association hruaitute chuan Aug ni 16-a Nanjing, China-a Youth Olympic Games neih turah India Weightlifting Federation-in rihinchawisiak (weighlifting)-a India aiawh tura a thlanchhuah pathum zingah Mizo tlangval TBC Lalchhanhima a tel ve thu an sawi a. He infiamna hi Olympic Games a tel tur hual lawkna anga sawi theih a nih thu tarlangin, kum 2016 Olympic-a Mizo thalai an tel ve theih nana Sorkar hmalakna – Vision Olympic 2016 rah chhuah anih thu an sawi bawk.
TBC Lalchhanhima hi Asia khawmualpui leh Commonwealth bakah khawvel huap intihsiaknaahte India aiawhin tirh a ni mek a. Youth Olympic Games-ah hian Weightlifting (56 kgs category)-ah August ni 17, 2014 tlai dar 6:00-ah a khel dawn a ni.
