Vawiin chawhnu khan Secretariat Conference Hall-ah Sports Minister Pu Robert Romawia Royte hovin National Cadet Corps (NCC) State Advisory Committee an thukhawm a. Sports Minister Pu Robert Romawia Royte kaihhruaina hnuaia State Advisory Committee meeting hmasa ber a ni.

Committee chuan Lungleia NCC Bn pahnih din theihna tura ruahmanna sawi hoin February Ni 12, 2019 khan Council Of Ministers thukhawm chuan an lo pawmpui tawh a. Tuirial Airfield-a NCC Academy leh Aviation Hub dinna tura hmalakna tarlan niin NCC hotute leh Sports Department hotu ten a hmuna endikna hun a rang lama kalpui tura rel a ni a. Meeting-ah hian NCC Office-a hnathawk mamawh zat te, NCC Academy din tura ex-servicemen tangkaina te, NCC Certificate holder tana hamthatna te, Mizoram huapa NCC Cadet (SD, SW, JD leh JW) tithate hnena kumtin chawimawina hlan te,  Associate NCC Officer (ANO) thawk tha hnena chawimawina hlan te, 1 Mizo Air Squadron, NCC tana lirthei mamawhna te sawi ho a ni.

Meeting-ah hian National Cadet Corps (NCC) State Advisory Committee Vice Chairman Pu TC Pachhunga, Sports Department, Planning Department, GAD, Finance, Revenue, Higher & Technical Department, School Education Department leh Mizoram State Sports Council hotute, ADG NER Hqrs. NCC, Shillong, Gr. Commander, NCC Gr. Hqrs, Silchar, Commanding Officer, 20 Mizoram Indep Coy., Aizawl leh Commanding Officer, 1 Mizo Air Squadron, NCC, Aizawl an tel a ni.