Vawiin chawhnu dar 2:00 khan Secretariat Conference Hall, New Secretariat Complex ah Sports & Youth Services Minister Pu Zodintluanga hovin Sports & Youth Services, School Education Department leh Mizoram State Sports Council hotu te an thukhawm a, MSSC hnuaia Sports discipline hrang hrang association ten Mizoram pum huapa intihsiakna an huaihawt thin leh School Education Department-in kum tina School Games an huaihawt thin te chu hmunkhata hmanho dan tur chungchang an sawiho. School Education Department-in School Games an huaihawt thin chu sum indaih tawk lohna avangin duh thalin an kalpui thei lo va, hetianga Sports Department te nena hmalak ho hian School Games changtlung zawk buatsaih a nih theih phahin school naupang zirlai, infiamna lam talent tha tak tak nei te tan hmasawnna a thlen ngei beisei a ni bawk a ni. Vawiin meeting hian Sports & Youth Services Department chuan Sports Association hrang hrang hotu te lo ko khawmin hemi tihhlawhtlin dan tur te lo sawiho se an ti a, School Education Department pawhin School Games Organising Committee lo kovin lo ngaihtuah se an ti a, rel fel ngai leh bawhzui zel dan tur te ngaihtuahin ni 23 June 2015 ah meeting neih leh ni se an ti bawk.

Vawiin meeting ah hian Pu Zothankhuma, Secretary, Sports & Youth Services, Pi Manisha Saxena, Commissioner & Secretary, School Education, Pu Zothanmawia, Director, Sports & Youth Services, Pu K.Lalthawmmawia, Director, School Education, Pu C.Laltlanthanga, Secretary, MSSC leh zirtirtu pawl MISSTA leh HISLLAM hruaitute an tel a ni.