Vawiin khan Kolasib District huam chhunga sawrkar laipui bultum thingtlanga hmasawnna scheme leh programme hrang hrang kalpui mekte ennawn leh thlithlaia, an thlen tawh chin leh harsatna an tawhte sawiho turin Kolasib District Vigilance & Monitoring Committee chu Rajya Sabha MP Pu Ronald Sapa Tlau hovin Kolasib DC Conference Hall-ah an thukhawm a. He meeting ah hian District atanga MLA pathum – Parliamentary Secretary Pu Hmingdailova Khiangte, Parliamentary Secretary Pu K. Lalrinthanga leh Pu P. C. Zoram Sangliana, MIFCO Chairman te an tel a. He Committee Member Secretary leh Kolasib DC ni bawk Pu Jitender Yadav bakah District Rural Development Agency (DRDA) Kolasib, Project Director leh a thawhpui te leh Kolasib District a Centrally Sponsored Schemes (CSS) kalpuitu Line Department hrang hrang aiawhte an tel bawk a ni.
Rajya Sabha MP Pu Ronald Sapa Tlau chuan meeting hi kaihruaiin tun tuma Kolasib District Vigilance & Monitoring Committee-a District atanga bialtu MLA pathum an tel kim thei chu lawmawm tiin Kolasib District chu ramri hrula awm leh Mizoram kawtchhuah a ni a, a dinhmun hi a pawimawh a ni, a ti a. District-a thuneitu leh thawktu chu hmasawnna hna thawhna kawnga a fawngchelhtu ber a ni a, Mizoram leh mipui tan an thawk a ni tih hre reng turin a chah a. Langtlang taka thil tih chu a pawimawh thusawiin Pu Ronald Sapa chuan mi reng rengin thil an thup chuan thil diklo a awm a ni tihna a ni thei a, tiin hnathawh leh hmalakna a bik takin hmasawnna lamhawi angte hi chu mipui hriata langtlang taka kan tarlan a pawimawh thu a sawi.
Pu Ronald Sapa Tlau chuan thil tha, thil dik leh langtlang thil tih chu hnathawktute thuvawn ni se tiin mimal tumah an tinzawn lova, an selna, zawhbelhna leh an hriatchian duhna te chu hmasawnna an ngaihpawimawh avang leh an thahnemngaihna avangte anih tih hriatsak turin officer kalkhawmte chu a chah a. Mipui thleng phak hmasawnna puanzar chu tun aia uar leh zual nise tiin MP chuan hmasawnna hnathawhna kawngah tlawmngai pawlte an pawimawh a, an thawh hlawk bawk a, kawng tam takah chuan a hmahruaitu niin an dinhmun a pawimawh a ni, a ti.
Vawiina District Level Vigilance & Monitoring Committee ah hian thingtlang tihhmasawn nan leh a chengte chawikanna atana sawrkar laipui scheme hrang hrang – ni za inhlawhna Mahatma Gandhi National Rural Employment Guarantee Scheme (MGNREGS); thingtlanga mirethei te chenna in sak sakna Indira Awas Yojana (IAY); ram chengchia cheibawl leh enkawlna Integrated Watershed Development Programme (IWMP); thingtlang inkalpawhna kawng sial Pradhan Mantri Gram Sadak Yojana (PMGSY) leh scheme dang te hnuaia hnathawh leh hmalak dan, sum an hmuh hman dan te chipchiar takin thlir hoin harsatna thenkhat awmte chu a kalpuitu Department aiawhte leh he Committee Member ten tarlangin chung harsatna te chu an sawiho a ni.
Meeting-ah hian hriselna kawnga Kolasib dinhmun chu CMO, Kolasib chuan a tarlanga. Kum 2014-2015 khan raihcheha thi MMR rate (mi sangkhat zelah) chu 2.15 leh nausen thi, IMR rate (mi sangkhat zelah) 35.5 an ni a. TB vei hmuhchhuah thar mi 79 an awm a, 2014 chhung khan mi 3 malaria avangin an boral a ni.
RMSA Kolasib in an tuam sikul 24 (sawrkar sikul -13 leh RMSA sikul – 11) awm mekah kum kalta chhunga an hmalakna hrang hrang an tarlang a. SSA hnuaia zirlai nuapang 10373 chu uniform pek a niin naupang 14234 te chu a thlawna zirlai bu pek an ni a. Mid Day Meal hnuaiah Upper Primary School 85 ah zirlai 5896 leh Primary School 102 a zirlai 8519 te chu chun chaw pek an ni a, hemi atan hian Cook 389 rawih mek an ni.
JNNURM hnuaia Integrated Housing & Slum Development Programme (IHSDP) programme hnuaia chhungkaw harsa zual tan chenna in 300, cheng nuai 704.02 senga sak zawh tawh a ni a, heng chhena in te hi an luah vek tawh a ni.
PHE Department in National Rural Drinking Water Programme (NRDWP) hnuaiah khaw 23 a tui lakna tur tih changtlun an tum a. NLCPR hnuaiah Bilkhawthlir Water Supply Scheme leh Bairabi Water Supply Scheme te chu zawhfel tawh niin hnu reilo tea hawn beisei a ni a. Hortoki Water Supply Scheme chu zawhfel tawh niin hei hi ONGC in Corporate Social Responsibility hnuaia an thawh a ni.
Kolasib District ah hian job card nei 17838 an awm mek a. Kum 2014-15 chhung khan MGNREGA hnuaia ni 24 inhlawhna siam a ni a, hemi atan hian cheng nuai 1069.42 hman a niin hna hrang hrang 367 thawh a ni a. Indira Awas Yojana hnuaiah 2014-15 khan chenna in 22 sak a ni bawk.
