Vawiin khan DPO Recreation Hall, SSA Office, Lunglei-ah Lunglei District chhunga ‘Swacch Bharat Swacch Vidyalaya’(SBSV) hnuaia School Management Committee zawng zawngte tan training neih a ni a, training hi Pu Kawlkunga Kawlni, Dy. District Project Coordinator-in a kaihruai.

District Project Coordinator Pu R.Laldawngliana chuan thu sawiin ‘Swacch Bharat Swacch Vidyalaya’ leh ‘Swacch Bharat Kosh’ hnuaiah school toilet chhia leh hmantlak tawh lote siam that a ni mek a ni, a ti a. Tunah hian Lunglei District-ah school toilet 56, pakhat zelah cheng nuai 1.8 zel sengin siamthat mek a ni a, NEEPCO-in school toilet 40 an sa mek bawk. Swacch Bharat Swacch Vidyalaya 2015-2016 chhung hian toilet 62 (mipa tan 59, Hmeichhia tan 3) pakhat cheng nuai 2.1 hmangin sak a ni dawn bawk a. Heng zawng zawng tana sum lo lut hi a hmangtu dik takte School Management Committee hnenah chauh pek tur a nih avangin hmun dang emaw thildang emaw tan pawhpen phal a ni lo, a ti. He Scheme hi Prime Minister-in a mimal taka a tuipui leh hmalakna rah a nih angin Prime Minister Office atang daihin vil a ni dawn a. Prime Minister-in a duhthusam dan a sawi tawh angin, kan fate tan thianghlim leh changkang tak inthiarna siamsak tum hi SMC-te mawhphurhna a ni a; inthiarna tha bakah school leh a chhehvel fai taka vawn hi kan tihmakmawh a ni tiin Lunglei District chu district dangte entawntlak ni thei turin SMC tinten thahnemngai leh rinawm taka hnathawk turin a fuih.

Pu C.Lalhmangaihzuala, Dy. DPC chuan hun kharna hmangin SBSV chu ‘one-time fund system’ a kalpui tur a nih avangin toilet saknaah rinawm taka sum hman a, khawtlang leh school hmingthatnaah ka tel ve a ni tih rirlu puin i thawk vek ang u tiin SMC member-te a chah.

SBSV hnuaia school toilet sak turte hi 12ft x 12ft a ni a, June thla chhungin sak zawh vek tura tih a ni.