Vawiin khan Mizoram State Sports Council (MSSC) Executive Committee chu an President Pu Zodintluanga, Sports Minister hovin a pisaah an thukhawm.
Meeting-ah hian kum 2017-18 chhunga an hmalakna tur chhawpchhuah leh sum hman dan tur rawtna an siamte an thlirho a. He an rawtna hi MSSC General Body meeting-ah pharh leh tur a ni. Association thenkhat dinhmun zirchianna neih leh sawiho a nih bakah MSSC Conference Hall hman dan tur te, procurement manual siam chungchang te, Association-te tana reserve fund hman dan tur leh tul dangte an rel a. General Body meeting neih hun tur an ruat nghal bawk. Meeting-ah hian sports infrastructure lama Mizoram than nasatzia tarlan niin discipline hrang hrang a players-te chhertu tur coach tha chah chhuah te, infiammi thahnem zawkin ram pawn an kal theih dan tur ngaihtuah te leh sports promotion lama tanlak a ngaihzia sawiho a ni a, hmalak dan tur an rel nghal bawk.
Sports Minister chuan tunhnaia sports discipline hrang hranga Mizo players-te hlawhtlinna a tarlang a. Chung zingah chuan April ni 3-10 chhunga Bangkok-a IWF Youth World Weightlifting Championship neih takah Jeremy Lalrinnunga’n silver medal pathum a dawn thu leh April ni 1- 9 chhunga Women’s Hockey World League - Round II, Vancouver, Canada-a neihah India Team-te League champion niin hetah hian Neihloh khua Lalhlunmawii a tel thu a tarlang a. World Cup Women Hockey 2018 ah India Women’s Hockey Team chu a qualify tak avangin Mizo hmeichhe hockey players-te an tel ngei dawn niin a lang, Pu Zodintluanga chuan a ti. Kum 2018 chhung-a Games liantham pathum - XXI Commonwealth Games, Asian Games leh Summer Youth Olympic Games-ah te Mizoram infiammite an tel ve ngei theih nan tan lak an tum thu leh Mizoram atanga India aiawha medal la thei ngei tur beiseiawm tak tak an awm thu Sports Minister chuan a sawi bawk.
