4108/2023-2024

Aizawl, the 9th March, 2024: Tukin dar 7:30 khan Sports & Youth Services Minister Pu Lalnghinglova Hmar, Aizawl West-II bialtu MLA ni bawk hovin UD&PA Department hotute leh khawtlang hruaitute chuan cheng vaibelchhe 20 senga Tuikual lui kam dung zuia kawngpui siamna tur, ‘Aizawl West Outlet’ project hmunhma an enfiah a, Tuikual thlanmual Jubilee Rûn-ah project chungchanga inrawnkhawmna an nei nghal bawk.

Meeting-ah hian Pu Lalnghinglova Hmar chuan thu sawiin, Aizawl West-II huamchhunga hmun pawimawh tak Tuikual lui kama motor kawngpui siam chu hunrei tawh tak atanga Aizawl West-II mipuite vei leh beisei tawh a ni, a ti a. Kawngpui chu kawtkai chhuahna remchang leh hnai a ni dawn a, rikrum thil, chhiatni thatni, faina leh hriselna, bawlhhlawh sawngbawl leh nitin khawsak kawngah mipuite tan a tangkai dawn hle tih sawiin, hlawhtling taka zawhfel a nih chuan Aizawl khawpui traffic jam pawhin a ziaawm phah thei dawn a ni, a ti bawk.

Sports & Youth Services Minister chuan hna tha leh chhenfakawm a duh ber thu sawiin, project hlawhtlin nan party politics rilru dahbo a, inlungruala theihtawp chhuah theuh turin kalkhawmte a sawm a. Department hotute pawhin theihtawp an chhuah tur thu a sawi bawk.

Meeting chuan motor kawngpui kalna tur detail survey neih thuai nise tiin a rel a. Dinthar veng chhunga lui kama ram neitute’n kawngpui siam nan an ram chin engemawzat an pe phal chu thil lawmawm tak a nih thu tarlan a ni a. Kawng chu mipuite hman tangkai tur leh an ta tur a nih angin, Tuikual North leh Tuikual South huam chhunga lui kama ram neite pawh hemi chungchang hi sawipui nise tih a ni a. Tuikual lui kam lehlama Assam Rifles ram chin hrechiang turin Land Revenue & Settlement Department hotute thawhpui nise, a tul chuan Assam Rifles hotute nen pawh a hmuna enfiah nise tih a ni bawk.

Aizawl West Outlet project hmunhma tur enfiahna leh sawihona hunah hian Dr. Andrew H. Vanlaldika, Director, UD&PA Department pawhin thu sawiin, uluk taka survey neih vat tum a ni, a ti a. Project hlawhtlinna tur chuan hnathawh vil that (monitoring) a pawimawh hle tih sawiin, khawtlang hruaitu kalkhawmte chu theihtawp chhuahpui turin a sawm nghal bawk.

Aizawl West Outlet project atan hian Special Assistance to States for Capital Investment (SASCI) scheme hnuaiah UD&PA Department chuan cheng vaibelchhe 20 a sanction tawh a ni.

Minister hi UD&PA Director leh Engineer-te bakah Tuikual North, Tuikual South leh Dinthar Local Council leh YMA te, Aizawl West-II Block ZPM hruaitute’n an tawiawm a ni.