4107/2023-2024

March Ni 9, 2024 zing khan Food Civil Supplies & Consumers Affairs (FCS & CA ) Minister Pu B.Lalchhanzova chuan Government Muanna Godown Complex leh Sairang a FCS&CA Godown tur sak mek te chu a hmunah a tlawh.

Minister chuan Government Muanna Godown a thawktu te kawmin an hnathawh dan te leh an harsatna neih te a ngaithla a. Thawktute chuan  Kudama buhfai lak luh, dah khawl leh phurh chhuah dan te an lo hrilhfiah a. Weigh bridge hman mek hun enge maw chen hman theih loha awm tawh pawh chu enfela siam that ani tawh chu lawmawm a tih thu minister hian a sawi.

Kudam thawm that ngai lai awm te chu ngaihpawimawh hmasaka nei turin department hotute chu a chah a. Minister hian Manipur leh Myanmar khawtual buaina  avanga buhfai demand sang chuan buhfai man tun hnaiah a nghawng nia an hriat thu a sawi a. Buhfai supply chungchangah department lama thawktuten theihtawp an chhuah chuan rah tha tak a chhuah ngei a rin thu a sawi bawk. Hemi kawng ah hian “Bharat Rice” lak luh dan pawh dap mek anih thu a sawi a ni.

Tun dinhmunah Government Muanna Godown Complex a Kudam te hi avaiin a capacity  Metric ton 1750  a ni a. Khawpui thangzelah bungraw phurh luh leh phurh chhuah chungchangah te leh sum senso lamah a economical zawk avangin kudam hi Sairang Dinthar lama sawn tura hmalak mek anih  thu sawiin ,Minister chuan GMG chu chhuahsan anih hunah pawh sawrkar in kudam complex ram chu uluk takin a humhalh chhunzawm tur thu leh ram leh mipui te mamawh  leh hman tangkai ngei tur thil atan sawrkar in a hman tur thu a sawi bawk.

Minister hian Dinthar veng, Sairang a FCS&CA kudam tur sakna hmun pawh, a bialtu MLA leh Adviser to CM ni bawk Pu TBC Lalvenchhunga  nen an tlawh nghal a. Supply Minister chuan hmasawnna ruhrel kan din reng rengte chu kan thlah te leh thangtharte tana chhawr leh hman tlak an ni tur a ni a ti a. Bialtu MLA leh helai hmuna khawtlang hruaitute chu hnathawh te lo enpuia lo vil thin turin a sawm bawk a ni.

Pu TBC Lalvenchhunga pawhin a bial chhunga Mizoram Sawrkarin Kudam a sa chu lawmawm a tih thu a sawi a. Contractor leh department lam te chu hna tha, asset tling din ngei tura chahin a enzui tur thu a sawi.

 Kudam lian in mi tam tak tan hnathawh tur a engemaw zat a siam sak tur chu   lawmawm a tih thu a sawi bawk a ni.

Kudam hi avaiin pathum sak tur niin, a lian ber Metric Ton 1500 leng chu SASCI suma Vaibelchhe 8.30 sengsa sak tur niin March ni 28, 2026 a sak zawh tur a ni a. Metric Ton 1000 ve ve lenna kudam pahnih te chu NABARD hnuaiah  Vaibelchhe 4.4 senga sak tur niin March ni 31, 2025 a sak zawh tur anni.

Minister hi   FCS & CA hotute- Pi Zodingpuii, Secretary , Pu VL Hruaizela Khiangte, Addl Secretary leh Pi Saizikpuii , Director te bakah mi pawimawh dang ten an tawiawm ani.