No.4322/2021-2022

Aizawl, 18th March, 2022 : Vawiin khan Zawlnuam Bawrai Veng Branch YMA Platinum Jubilee chu Tourism Minister Pu Robert Romawia Royte-in a hmanpui.Thu sawiin Pu Robert Romawia chuan YMA chu ramriin a daidan ve loh khawvel Zofate zawmkhawmtu pawl hlu leh pawimawh a ni a, tanpui ngaite tanpui a; riangvaite hnem a, mangangte thlamuantu a ni a, a pawimawhna a zual zel ang a ti a. Headmaster-a a lo thawh ve tawhna Govt. Bawrai H/S-a Computer zirna bakah Mizorama la hman lar loh Smart Classroom System ICT Deptt-in a din chu lawmawm a tih thu sawiin, zirtirtu leh zirlaiten an hman tangkai a beisei tih a sawi a. Bawrai Veng chu Mizo hnam pum huap pawha mi chhuanawm, hlaphuah thiam leh zaithiam lar Pu Lallianmawia Pachuau te leh mi ropui dang tam tak lo chhuahna a ni a, thangtharte pawhin tan la zelin, Zoram timawitu ni zel turin duhsakna a hlan a. Bawrai Branch YMA-in Platinum Jubilee a thlen lawmpui nan Mizoram Sorkarin Bawrai Vengah Futsal, Basketball leh Volleyball te indoor-a khelh theihna tur Bawrai Integrated Sports Centre(BISC) chu Rs 130 Lakh sengin a din dawn a, April 2022-ah hna tan tum a ni a ti. Minister hian Bawrai Branch YMA te hi sum faia a tanpui bakah Computer Set kimin a pe bawk a ni. Jubilee lawmna programme hi Pu P.C. Lalhruaikima, Vice President, Bawrai Veng Branch YMA-in a kaihruaia, Central YMA President Pu R.Lalngheta pawhin thu a sawi a ni.

Pu Robert Romawia chuan vawiinah vek Zawlnuam Tourist Lodge Complex chhunga Community Service Centre Rs 140 Lakh senga PMJVK scheme hnuaia sak tan mek lungphum pawh a phum a. Hei bakah hian Govt. Zawlnuam College-a ICT Deptt leh NIELIT tangkawpa din tur IT Skill Development and Training Centre lung a phum bawk a ni. He Centre hi he College-a zirlaite bakah Zawlnuam leh a chhehvel thalaiten computer course chi hrang hrang an zirna tura ruahman a ni a. A infrastructure tulte hi Rs 99 Lakh senga siam tur a ni a, a sum 50% hi Mizoram sorkar kutah a lo thleng tawh a ni. Pu Robert Romawia Royte chuan Zawlnuam College chu nuam ti taka a lo thawh ve thinna a nih thu sawiin, a Minister nih hlim kum 2019 kumtira Zawlnuam Tourist Lodge leh Zawlnuam College Hall thar a hawn kha Minister anga a thil hawn hmasakna a nih thu a sawi a. Kum 3 chhunga a vawi 2 na atan Govt.Zawlnuam College-ah bawk IT Centre lungphum a phum leh thei chu lawmawm a ti a. He College lo puitlin theih na tura theihtawp chhuahtu, boral tawhte leh la dam mekte pawh a tharin zahna chibai a buk a. Tunlaiah IT thiamna a pawimawh a, NIELIT hotute nen lo rel tawh angin he Centre ruhrel peih veleh zirtirna kalpui zui a nih tur thu a sawi. He College Principal lo ni tawh thin Pu Robert Romawia Royte chuan Govt Zawlnuam College ten a phu loh Chawimawina Citation an hlan chu lawmawm a tih thu a sawi bawk.
IT Centre Lungphum Function hi Govt Zawlnuam College Principal Prof Harendra Sinha-in a kaihruai a, Pu Vanlalringa, Sr Informatics Officer-in Technical Report pein VCP Pu CT Sanga'n lawmthu a sawi a ni.

Pu TC Pachhunga, Ex MLA & Vice Chairman, SYA,T&ICT Development Board leh official pawimawh dangten Sports Minister hi an tawiawm a ni.