Sports Minister Pu Zodintluanga chuan vawiin khan Champhai Chhangphut Field-ah Vanbawia Memorial Football Tournament, Champhai District Football Association buatsaih chu a hawng. Minister chuan Champhai District thalaite, inkhelhna lama tui chuan tumruhna leh tih tak takna nen bei tura chah in, nakin lawk a Zofate ti hming tha tura a beisei thu a sawi a. Sports discipline hrang hrangah India team-a tel pha Mizo thalaite an awm chho zel a. Sorkarin infiamna lama thalai ten eizawnna tlak an hmuh theih nan a ruahmanna a siam chuan rah a chhuah zel thu leh, hmasawnna nasa zawk hmuh belh zel a beisei thu a sawi a ni.

Vawiin khan Minister hian Champhai Zotlang a Sports Stadium, UD&PA hnuaia sak mek chu a hmunah a enfiah bawk a. Pu Zodintluanga chuan Mizoram a stadium puitling hmasa ber tur a nih thu leh, tangkai taka hman a nih a beisei thu a sawi a ni. Minister hi UD&PA, PHE Department, District Sports Office leh I&PR atang official ten an tawiawm a ni.