Sports & Youth Services Minister Pu Zodintluanga chuan tukin zing dar 7:30 khan NEC suma sak tur Electric Veng Indoor Stadium lung a phum.
Electric Veng Branch YMA President Pu K.Lalthanmawia kaihhruai inkhawmna tawi neih ah Minister chuan khawtlang hmasawnna tura veng mipuite hmalakna, thawhrimna leh tumruhna te chu fakawm tiin thalai infiammi thahnem tak an lo chherchhuah tawhnaah lawmthu a hrilh a. A department chan UD&PA hmalakna thenkhat sawiin Minister chuan mi rethei te chenna tur in sak mek te, Aizawl chhuahlam te tan tui chhia, zun/ek thli mumal taka luantira hmanrua changkang taka enkawl leh sawngbawlna ruahman a nih mek dan leh ADB atanga hemi atana sum hmuh fel tawh a nih thu te a tarlang bawk. Tunlai hunah veng bil rilru lak nat lutuk chuan hmasawnna a tihthuanawp theia a hriat thu sawiin Pu Zodintluanga chuan rilru zau tak put a tul thu a tarlang bawk.
Bialtu MLA Parliamentary Secretary Pu Lal Thanzara pawhin he hun hi hmanpuiin Mizo thalaite mamawh leh tuihalna hriatpuia, infiamna lama hmasawnna tura Sports Minister chak tak kan nei chu lawmawm a tih thu a tarlang a. NEC suma sak tur Electric Veng Indoor Stadium chu sak tan mai theih a nih thu a sawi lang bawk.
Hall Committee Chairman Pu C.Vanlalchhuana chuan Indoor Stadium sak nana Power & Electricity Department ram an neih dante leh sum mamawh tur NEC lam atanga an dawn dan te sawifiahin Chief Minister bakah bialtu MLA Pu Lal Thanzara leh Sports Minister te thahnemngaihna leh chak taka an bawhzui sakna zawng zawngah lawmthu a sawi bawk. Electric Veng Indoor Stadium sak nan hian NEC atangin sum Rs 493.62 lakhs pek an ni a, NEC chuan First Installment Rs 160 lakhs an rawn sanction tawh nghe nghe a ni. A building hi chhawng li ni tura ruahman a ni a, motor parking te, Shooting Gallery, Boxing Ring, Table Tennis, Gymnasium, Indoor Basketball leh Volleyball bakah tlawmngai pawl hrang hrang te Office pawh khung tel tura ruahman a ni.
Electric Veng Indoor Stadium sakna tur lungphumna ah hian Sports Secretary Pu R.Lalvena, Mizoram State Sports Council Secretary Pu C.Laltlanthanga te bakah khawtlang hruaitu thahnem tak an tel a ni.
