Home Minister Pu R.Lalzirliana chuan nimin ni 12/7/2013 chawhnu dar 1:00 khan Tamdil Wetland Development Activities a hawng.
Tamdil Wetland hawnnaa thusawiin Minister chuan Tamdil ram velah kum 30 lek kaltaa ramsa an la tam thu sawiin ramngaw te kan thiah zel avanga tunah ramsa leh nungcha hmuh tur an awm tawh loh pawi a tih thu te a sawi a. Ramngaw, lei tha leh nungcha te humhalhna tura Environment & Forests Department -in Tamdil Wetland a buatsaih chu lawmawm tiin thalai te tan pawh intihhlimna hmun tha tak a nih ngei a beisei thu a tarlang. MLA tanglai Pu R.L.Pianmawia Govt Deputy Chief Whip man a nih chungchang sawiin Pu Lalzirliana chuan ruling MLA ni mah se la, Magistrate leh Police te chuan an tih tur dik tak an tih chu sorkarin rorelna dik a kenkawh lantirna a ni, a ti a. Home Minister a nih anga man hrih lo tura thuneihna a neih thu te, Assembly Session koh a nih tawh avanga Speaker remtihna lo chuan man theih a nih loh dan te a sawifiah a, diklo taka an thuneihna hmang tura chhia an chham loh thu sawiin sorkar dinglai ah Police kut phuar phelh a nih tarlanna a nih dante a sawifiah bawk. Magistrate ten an chhuifiahna ah thudik chu hailan niin Pu R.L.Pianmawia chuan thiamlohna a nei lo tih chiang taka hmuhchhuah a nih ngei a rin thu a tarlang bawk.
Khualzahawm Environment & Forests Minister Pu H.Rohluna chuan tunlai hunah tuihna te a tlem tawlh tawlh avanga ramngaw leh nungcha humhalh a pawimawh zia hriaa mipui kan harhchhuah a tul tak zet a ni, a ti. Mizorama cheng ten kan ram kan humhalh loh chuan tumahin an rawn humhalh dawn lo a, keimahni tan a pawi dawn a ni, a ti. Tamdil chu zin veivak te tana tlawh nahawm taka siam a remchan thu sawiin tun aia tha zawka enkawl a duhawm thu a tarlang bawk. Ramhmul damdawi chin nan leh research tih nan te Tamdil chu hman tangkai theih a beisei thu sawiin Mizoram tana rotling pawimawh tak a nih hriaa, dil, nungcha, thing leh mau humhalh kawngah pawh a enkawltu department te kutah dah mai lova, a chhehvela cheng mipui te tawiawmna a ngen bawk.
Tamdil Wetland hawnna, PCCF Pu J.L.Singh, IFS kaihhruai ah Parliamentary Secretary Col.Z.S.Zuala pawhin thusawiin tunhnaia Uttarakhand-a chhiatna rapthlak tak, mi tam takin nunna an channa chhan chu mihring siamchawp, fimkhur loh vang, dan bawhchhiatna leh ram leilung, boruak leh ramngaw te tih chereu nasat vang a nih thu a sawifiah a, chutiang chuan chhiatna rapthlak a thlen theih hre renga kan ramngaw, nungcha leh lui te humhalha tan kan lak tlan a pawimawh thu a tarlang bawk. Mizoram KVI Board Chairman Pu K.Lianzuala, MLA pawhin sorkarin ramngaw leh nungcha humhalh kawnga hma a lak mekna chu a lawmawm hle laiin a la tawk lo a, mipui nen theihtawp chhuaha kan ramngaw chereu chak tak humhalh tura thawhho a tul a ni, a ti.
Tamdil Wetland hi 13.5 sq.km.-a zau a ni a, Ministry of Environment & Forests, Government of India chuan kum 2004-2005 khan Wetland ah a lo pawm tawh a, a cheibawlna senso pawh a rawn tum a ni. He Wetland enkawltu atan hian Mizoram Sorkar chuan State Level Steering Committee a din a, Chief Secretary hovin a kaihhnawih department hotute bakah tlawmngai pawl aiawh leh mithiam thenkhat te member ah ruat an ni. He hmun cheibawl nan hian thei kung te phun a ni a, leitha luang ral tur venna siam te, multipurpose nursery siam te, sangha chi khawina na, a chhehvela khaw mipui te vawk leh ar vulhna tanpuina sum pek te leh hna dangte thawh a ni a. Tamdil hmunah hian sava chi hrang hrang pawh hmuh tur an awm mek bawk a ni.
