Vawiin khan Health Minister Pu Lalrinliana Sailo leh Chairman, Mizoram State AIDS Control Society (MSACS) ni bawk kaihhruaina hnuaia MSACS, Governing Board chu a pisaah an thukhawm. Meeting-ah hian Health Secretary Pi Esther Lalruatkimi, IRS, MSACS Director Dr. Eric Zomawia leh Governing Board Member thahnem tak bakah tlawmngai pawl – YMA leh MHIP aiawh te pawh an tel a ni. Pu Lalrinliana Sailo chuan chuan MSACS-in theitawp chhuahin, AIDS darh zel tur venna kawnga tha taka thawkin chak takin hma an lak thu a sawi a. Mizoramah kum 2007 atanga 2011 inkara HIV hluar dan a tlakhniam thu Ministry of Health & Family Welfare Report ‘Technical Report India, HIV Estimates-2012, NACO’ ah tarlan hian chiang takin an thawhrimna a tilang a ni, a ti. AIDS dona leh venna kawnga Red Ribbon Football Tournament te, Red Ribbon Drama Competition buatsaih te hi a hlawtling a, AIDS dona kawnga Kohhran leh tlawmngai pawl te nen thawhhona tha tak an neih zel thu a sawi.
Health Minister chuan MSACS anga an hmalakna chu lawmawm a tih thu leh department dang dangte leh Tlawmngai pawl te, Media te, Kohhran leh HIV positive pawl ngeite pawhina theihtawp kan chhuah tlanna rah chu Zoramin kan seng chhoh mek thu leh hemi avanga tha thlah mai lova nasa zawka tanho a tul thu a sawi bawk.
He Report-in a tarlan dan hian Mizorama mihring kum 15 -49 inkarah, HIV hluar dan za zelah 2007-a 0.79 ni thin chu 2011-a chuan za zelah 0.74 ah a tlahniam. HIV hluar dan hi 2008 khan za zelah 0.78, 2009-a za zelah 0.76 leh 2010 khan za zelah 0.74 te a ni. Hei hian kum 2007-2011 chhung khan Mizoram HIV pun zel dan rate chu tlahniam tih a entir a ni.
He meeting-ah hian kum 2012-2013 chhunga MSACS hmalakna report te ngaihthlak a ni a, kum 2013-2014 chhunga MSACS Action Plan National AIDS Control Organization, Department of AIDS Control, Ministry of Health & Family Welfare-in a rawn pawm chu an thlirho hnuah lawm takin an pawm. MSACS report-in a tarlan danin kum 2012-2013 chhung khan thisen 59088 (General 38560 leh Pregnant Women 20528) an test-ah HIV kai thar mi 1142 (General 1022 leh Pregnant Women 120) an hmu chhuak. HIV kai hmuhchhuah tawh zingah mi 6060 laiin ART Centre atangin enkawlna an dawng tawh a ni. Thisen a thlawna pekna kawngah pawh nikum chhung khan thisen unit 22358 lakkhawm a ni a, heng zinga 21032 (94.07%) chu Voluntary-a pek a ni. Kohhran leh tlawmngai pawl ten HIV positive te sorkarin a puih theih piah lam kawnga tanpuina tura hma an la tan chhoh mek chu a lawmawm an tih thu an sawi bawk.
Kum 2013 atang hian National AIDS Control Program Phase-IV chu Sorkar laipuiin a kalpui tawh dawn a, AIDS dona tura sum tam zawk pawh hi ram dang leh pawl dang tum aia tam zawk chu sorkar laipui hian a tum tawh dawn a ni. HIV/AIDS hi MSACS leh NACO chauhvin do lova, sorkar department hrang hrang te nena thawhhona leh a Program hi pawl leh mimal tu pawhin anmahni theihna zawn theuhva lo do ve chu Sorkar vision anih thu pawh meeting-ah hian an sawi a ni. Hemi atan hian sorkar department tinte nena Workshop neih dan tur pawh an rel nghal a ni. MSACS Rules and Regulation siamthat leh ennawn chu sawiho a nih hnu in pawm bawk a ni.
