Tarlan tawh angin Aizawl District huamchhunga khaw 13 leh Kolasib District hnuaia khaw 2 te tun thla July ni 23 a VC By Election neih turah Model Code of Conduct chu kenkawh a ni tawh a. Hemi chungchangah hian State Election Commissioner chuan thuchhuah siamin Model Code of conduct kenkawh dan chipchiar zawkin a tarlang a ni.
SEC chuan Model of Conduct para VIII bik chu hetiang hian a sawifiah a ni. Model Code of Conduct-in a huam Aizawl leh Kolasib District-ah hian sawrkar mi pawimawh ten inthlan campaign-na atan sawrkar lirthei hmanga zin vei vah leh official visit leh inthlan campaign neih kawp a khap a, sorkar fakna lam chi advertisement hrang hrang chhuah leh inthlan duty tura ruat tawh te chu an awmhmun sawn (transfer) a khap bawk a ni. Engpawhnise, hmasawnna hnathawh thar tur te chu District pum huapa khap ni lovin inthlanna tur khaw bil te te huap erawh chuan chawlhsan rih tur a ni.
MGNREGS hnuai a hna kal lai mek thawh chhunzawm phal a ni a, a thar bul tan erawh khap a nih laiin tul bik thilah chuan District Election Officer kaltlanga State Election Commission phalna lak a nih chuan hna thar bul tan pawh remtih theih a ni. Hetiang bawk hian MP leh MLA Fund te pawh khuahkhirhna siam an ni. NLUP bikah pawh a dawngtu tur mi thar thlan te, NLUP sum leh thil dang sem te, NLUP puanzarna thil leh enzui hna zawng zawng te pawh inthlanna tur khuaah te hi chuan chawl rih turin Model Code of Conduct chuan a ti bawk.
