1713/2023-2024

Aizawl, the 31st August 2023 : Sports Minister Pu Robert Romawia Royte-in vawiin khan Govt Central Higher Secondary School Annual Sports kharna Republic Veng YMA Hall-ah khuallian niin a hmanpui.

Khuallian chuan kalkhawmte hmaah thu sawiin Govt Central HSS ten Annual Sports hlawhtling taka an nei chu a lawmpui a, zirna, hriselna leh inpawh tlanna kawngah hma an sawn phah ngei a beisei thu a sawi.

Sports Minister chuan tunlaiin a chhe zawnga thil thlir chi ten Social Media hmangin mipui rilru hruaikawi thei thu leh hla belhchian dawllo leh mi dangte rilru tina thei phurpui an tam a, a pawi hle a ni a ti. Zirlai naupangte chu social media-a thu leh hla rindan chin tawk thiamin thu thalote leh a post thintute hnualsuat nachang hriat a pawimawh a ti.

Minister chuan taksa fit pawimawhzia sawiin taksa leh rilru hriselna leh hlim nan sports awmze neia sikulah uar a tul, chu chu National Education Policy 2020 duh dan pawh a ni a ti.

Govt Central HSS Annual Sports hi ni li chhung, 21-24 August, 2023 khan House pali-ah inthenin Rajiv Gandhi Stadium, College Veng Field leh Republic Community Hall-ah Outdoor Events paruk leh Indoor Events panga-ah te intihsiakna an nei a, a pum puiah Yellow House pakhatna an ni.

Govt Central Higher Secondary School hi kum 1996-ah Arts stream din a ni a, kum 2016 atangin private-in Science stream din belh a ni a. Tunah hian Principal leh Teaching staff 26 leh zirlai 420 an awm mek a. Kum 2022 HSSLC Board exam-ah khan 86% an pass a ni.