1714/2023-2024

Vawiin khan District Education Office bultumin Champhai District Level Students' Science Seminar, 2023 buatsaih a ni a, Pi R. Lalramhluni, District Agriculture Officer, Champhai chu khuallian a ni.

Khuallian Pi R. Lalramhluni chuan kumin hi UN chuan Year of Millets atan a puan thu sawiin, Millets hi hmalai Mizo pi leh pu te chuan faisa emaw buhtun tiin an lo chin tawh thin thu a sawi a, tunah chuan buh kan tih mai hian a rawn luahlan mek tih a sawi a, Pathianin kan rama a lo dah sa Millets hi sum leh hmasawnna duh luat vanga humhalh lovin ram dang siam ah kan innghat a, kan rama awm sa aiin ram dang buh hlir kan ei tawh a, kan rama awm sa Millets chin hi kan intihhmuh leh a ngai tih a sawi. Japan ramah chuan an thil tharchhuah hlutna an tipung thin tih a sawi a, an ti tui-in dahthat theihin an siam thin tih a sawi a, Mizoram pawhin kan ram tharchhuah ang angte hi a hlutna kan tihpun thiam a tul tih a sawi a, ram dang atanga kan lakluh te pawh a hlutna lo tipung a, lo tidanglam a, ram danga hralhchhuak leh tura hmalak theih a nih thu a sawi bawk.

Pu R. Lalramhluni chuan ram changkang tak tak te chuan an rama thil awm sa an hmang tangkai a, ram nuam an siam thin a, ram tharchhuah nei lote pawhin ram dang atanga an lak luh chu siam danglamin a hlutna an lo tipung a, sumdawnna tha takah an hmang leh thin tih a sawi a, ram ang leh hnam dangin an neih ve loh chingal hrisel tha tak pawh mizo te chuan kan nei a, mahse vai siam chhuah leh enge an pawlh pawh hriat loh, hrisel lo zawk Soda kan ei ta te chu pawi a tih thu sawiin, chingal hrisel tak hi a hlutna kan hriat thar leh a, soda aia kan hman leh thuai a tul tih a sawi.

DAO chuan Zirlai te chu an hmaah Pathianin thil ropui tak a dahsak tih hre reng turin a chah a, lungawina nen zirna chhunzawm zel turin a fuih a, thalai thluak tha tak an neih angin an tum phawt chuan thil ropui tak an ti thei tih a sawi a, dik taka nung tur leh sum bawiha tang lo turin a chah a, an nu leh pa te thawhchhuah zahsak a, an thawhchhuah a tam emaw a tlem emaw pawh nise an zahsakna chuan hlawhtlinna a pe thei tih a sawi a, kuthnathawktute hmu hniam ngai lo turin a chah a, dik lo taka sum la lut teuh te ai chuan kan eitur thawkchhuaktu kuthnathawktute hi ngaihsan zawk tur an nih thu a sawi bawk.

Zirlai te chu a tha zawngin an kut hlei se a duh thu sawiin chu chuan chhungkua leh ram changkanna a thlen dawn tih a sawi a, Leilet kan nei mek te humhalh a tul hle tih pawh sawiin, hmasawnna duh luat vanga Kudam nasa taka an leilet a sa ta Utter Pradesh te chu tunah hian an talbuai mek tawh tih a sawi a, chutiang dinhmuna ding lo tur chuan Mzioram a Leilet phai nei zau ber Champhai pawh tun atanga kan fimkhur a ngai tih a sawi bawk.

He hun hi District Education Training Hall ah hman niin Pu C. Lalbiakzauva, DEO & DPC Samagra chuan a kaihruai a, zirlai kalkhawm ten Millets - A super food ir a Diet Fad tih topic hmangin Presentation an pe a, mi pakhat in min 6 chhung zel hun an nei a, Top 3 te thlan an ni ang a, pakhatna te chu State Level ah Champhai aiawhin an kal leh dawn a ni.