1715/2023-2024

Aizawl 31st August, 2023: ‘Agriculture Study Tour leh a Kaihhnawih’ tih lehkhabu Pu.H.Rammawi ziah chu vawiin khan Land Resources, Soil & Water Conservation Department Conference Hall Aizawlah Pu Tawnluia, Dy. Chief Minister-in a tlangzarh.

Lehkhabu tlangzarhtu Dy. CM chuan lehkhabu rotling kuthnathawktute tan ram changkangte'n thlai leh thei chin dan leh hlawk dan information pawimawh tak tak awmna tlangzarh theia a awm chu a lawmawm takzet a ni a ti a. Kan Ram leilung hmanga thlai leh theite hlawk zawka chin dan leh sawngbawl dan tur min kawhhmuh ngei a beisei thu a sawi a ni.

Pu Tawnluia chuan a lehkhabu tlangzarh chu fakin "Mipuite ei leh bara an intodelh theih nan he lehkhabu hi kan hman ngei ka ring" a ti. Sorkar policy Socio Economic Development Policy (SEDP) thil tum ber pawh kan ram leilung hausakna hmanga horticulture, ran vulhna lamte bakah thlai leh thei hmanga intodelh a nih angin he lehkhabu-a a kawng kawhhmuhtu a tana tangkai tak a nih tur thu a sawi bawk. Kan kuthnathawktute chhan nan hmasawnna tluantling kan neih a ngai a, thlai leh thei suma chantir mai tur kan thlan thiam a ngai tak zet a ni a ti. Sum peipun lamah sorkarin hma a lak mek thu sawiin, tunah hian Resource Mobilization department pawh buatsaih mek zel a nih thu a sawi bawk.

Lehkhabu ziaktu Pu H.Rammawi chuan a lekhabu ziah dan leh ziah chhan tlangpui sawiin kum 1984-ah India ram delegates 34 te'n khawvel hmun hrang hrang 12(USSR, France, Netherlands, UK, USA, Japan, South Korea, Taiwan, Hongkong, Thailand, Malaysia leh Singapore) agriculture hmasawnna lam an kalpui dan zirchiang tura an zin chanchin sawiin kan ramah hian Rubber chin dan leh Oil Palm chin chungchangah titi lengvak a tam em avanga a lehkhabu chu a ziah chhan pakhat a nih thu a sawi a ni.

Lehkhabu tlangzarhna program hi Commissioner Lalkiamlova'n a kaihruaia, Pu C. Lalmuanpuia, MLA in hunserh a hmang a ni.

Vawiin Lehkhabu tlangzarhah hian Dy. Speaker H.Biakzaua, Er. Lalrinawma, Cabinet Minister, Pu. T.J Lalnuntluanga, Minister of State bakah Pu. K.Vanlalvena, Rajya Sabha MP, Pu Ramthanmawia, MLA  leh khualtha sawmbik an tel a ni. He hunah hian Pu C.Ngunlianchunga , MLA leh Dr. C Lalsangzuala, Mizoram State Commission for Protection of Child Rights Chairman te'n thu an sawi bawk.