1717/2023-2024

Aizawl, the 31st August, 2023: MC Lalrinthanga Publications (MCL Publications) Office thar, lehkhabu an chhuah sak hrang hrangte leh document pawimawhte dahkhawmna 'MCL Publications Office cum Library', Khatla South chu vawiin chawhnu dar 2 khan Deputy Chief Minister Pu Tawnluia'n a mamawh apiangte hman theih turin a hawng.

Deputy Chief Minister Pu Tawnluia chuan Pu MC Lalrinthanga sulhnu bakah hmalakna kaltlanga lehkhabu chhuah leh document pawimawhte dahkhawmna, 'MCL Publications Office cum Library' hawn a ni chu lawmawm a tih thu a sawi a. Lehkhabu leh document pawimawhte tha taka vawnhim chu thangtharte tana rohlu a ni, a ti a. Ram leh hnam tana inpe zo, zopa tak leh hnam thinlung pu mi, naupang te ni chunga remna leh muanna kan neih theihna tura theihtawp chhuahtu leh thu leh hla ziah, chhut chhuah leh thehdarh kawnga mi tangkai tak, Pu MC Lalrinthanga sulhnu hrang hrangte chu tangkai taka hman a nih a beisei thu a sawi a. A kutchhuak leh lehkhabu chhutte mamawh huna en mai theiha dah chhuah a ni chu remchang a tih thu sawiin, a taksa awm tawh lo mah se a thu leh hlain Zoram khawvel a chenchilh reng tawh dawn a ni, a ti bawk.

He hun hi Pu V.L. Zaikima'n kaihruaiin Upa Biakhnuna'n hunserh a hmang a. Pu MC Lalthianghlima hnen atangin MCL Publications Office leh Library report ngaihthlak niin, Pi F. Chhunghnemi'n lawmthu sawiin hun hman a khar a ni.

MCL Publications Office cum Library-ah hian Pu MC Lalrinthanga lehkhabu publish 52 te, a kutchhuak document pawimawh tak takte leh lehkhabu dangte dah a ni a, hengte hi a mamawh apiangte tan a hmuna panchilh reng theih a ni.