1718/2023-2024

Aizawl, the 31st August, 2023 : Vawiin khan School Education Department leh Doordarshan Kendra Aizawl-ten School Education Secretary Office Chamber-ah DD Mizoram channel-a Educational TV Programme chhunzawm nan inremna an ziak. He inremna ziah thar lehah hian School Education Department aiawhin Secretary Dr Lalzirmawia Chhangte chuan a ziak a, Doordarshan Kendra Aizawl aiawhin Head of Programme Pu C.Vanlalsiama’n a ziak bawk.

Dr Lalzirmawia Chhangte chuan he hunah hian thusawiin kum 2015-a bul tan Educational TV Programme chhunzawm zel a ni chu lawmawm a tih thu a sawi a. tunlai khawvelah classroom teaching ringawt hi zirna atan a tawk tawh lova, tunlai technology hmanga zirtirna kalpui hi a pawimawh a ni a ti a. DD Mizoram hi thlirtu an tam a, Zoram chhung mai bakah state dang leh ram thenawm atangin an thlir thei a, a hlawkna teltu an tam thei hi a hlu hle a ni a ti. Nitina zirna belhchhahtu Educational TV Programme kan nei hi a tangkai a, thingtlang naupangte pawhin hriatna belhchhah thei tur programme tha kan neih phah a, tangkai leh zual zawka hman dan ngaihtuah zel ni se, programme tha zawk siam dan te pawh ngaihtuah ni se tul a tih thu a sawi.

DDK Head of Programme Pu C.Vanlalsiama chuan School Education Department nen thawhdunna an ziak leh thei ta chu lawmawm a tih thu a sawi a, hripui len lai programme pangngai chhuah theih loh laia Tutorial video tihchhuah a ni te kha zirlaite tan a hlu a, zirna khaihlak lovin a kal theih phah a, mamawhtute chhanna a ni a ti a. Zirlaiten an hlawkpui zel theih nan leh zirlai tam zawkin an chhawr theih nan thlirtu tihpun dan te pawh dap tul a tih thu a sawi bawk.

Pu Lalsangliana Director School Education chuan kum 2015 atanga thawhdunna neih tawh dan report pein Educational TV Programme chu School Education, SCERT leh MBSE te tanghova programme siam thin a nih thu a sawi a, September 2023 atangin kum khat chhungin chawlhkar tin Ningani apiangin tlai dar 5:55 - 6:25pm inkarah programme tihchhuah chhunzawm a ni dawn a, TV programme atana tul pawimawh chu Programme Advisory Committee-ten an umzui dawn a ni a ti. TV Programme hi Media Cell, School Education Department leh SCERT ten an siam leh dawn tih a report bawk.

School Education Department leh DDK Aizawl ten Educational TV Programme tihchhuah chhunzawmna atana thawhdunna tur thuthlung ziahna Pu R.Lalbiakzuala Joint Secretary School Education kaihhruaiah hian School Education Department Secretary leh Director bakah SCERT Director Pi Zohmingliani te, MBSE, Samagra leh DDK hotute te an tel a ni.