145/2023-2024
Aizawl the 19th April 2023: Nizan khan Directorate of Sports & Youth Services Department buatsaih 'Incentive Cash Award 2020-2021' semna inkhawm chu Vanapa Hall-ah neih a ni a,Sports Minister Pu Robert Romawia Royte chu khuallian niin Award semna a nei a ni.
Khuallian chuan covid-19 hrileng avangin punkhawm a harsa hle a,Incentive Cash Award pawh duh ang a hmaah sem a harsat thu a sawi a ni.Khawvel in infiammite a gaihhlut thu tarlangin Mizoram ah pawh infiammite ngaihhlut a tul takzet tawh a ni, a ti a.Zanin a Award sem tak chu medal-la nazawng te dawn theih a ni lo a,Incentive Cash Award Scheme-hnuaia thlanchhuah te chauh in an dawn theih thu a sawi a ni .Mizoram sawrkarin infiammite hamthatna tur kawng hrang hrang a ngaihtuah thu sawiin,Incentive Cash Award Rules 2001 chu siamthat niin kum 2022 khan Incentive Cash Award Scheme tih a lo ni ta a;he scheme thar hnuaiah hian infiamiten medal an lak dan a zir leh a enkawltu leh inelna neihna hmuna hruaitu official-te sum leh pai pek dan tur felfai taka duanchhuah a lo nita a ni,a ti.Incentive Cash Award Scheme-in a tum ber chu infiammite tih phur leh sang zawk an thlen theih nan te,anmahni inenkawl na leh mamawh leina tura sawrkarin tanpuina pek anih thu tarlangin, infiammite chu nasa zawk a tan a lak tir ngei a beisei tih a sawi bawk a ni.Mizoram in medal tamzawk a lak theih nan medal tamna sports uar zawk a kalpui angai nia a hriat thu sawiin a bik takin athletics,swimming leh archery-te chu mizo thalai tamzawk ten luhchilh se a duh thu a sawi a ni.
Minister chuan Mizoram sawrkarin infiamna a gaihpawimawh thu tarlangin sports chu industry-ah a puang hial a ni, a ti a.Sports ruhrel hmasawnna turin theihtawp chhuah a ni a,sports zirna tur(sport school) pawh Mizoram hmun nga laiah siam mek a nih thu sawiin ,reilote ah hawn thuai a ni dawn a ni, a ti.Sawkarin infiamna tur hmunhma a siam te leh infiammite tihphurna tur Incentive Cash Award-a sem thin te chuan thlaite ah chona thar thlen ngei se a duh thu sawiin,Mizoram bakah India-tan a mi chhuanawm ni tura tan la thar turin a chah bawk a ni.
Pu Robert Romawia Royte chuan infiamna chu hriselna atan a thil tangkai tak anih thu a sawi a,mipui tamzawk in hriselna tha an neih theih nan infiamna engemaw tal ti thin turin mizo mipui te a chah a.Ram hmasawnna turin hnathawh a ngai a,hnathawk turin hrisel a ngai bawk a,hlim tak leh phur taka hnathawk thei turin infiamna pawh mipuiten uar thar a ngai a ni, a ti.Infiamna hi a hriselin a thianghlim em em a,infiammite chu rilru thianghlim pu turin a chah a. Infiammite rilru tihnual zawng a tawngkam neih palh a hlauhawm hle a ni a ti a, infiammite rilru tina zawng a tawngkam nei lo tur leh infiammite tiphur zawng zawk a tanrual a ngaih thu sawiin infiammite puihbawm leh fuih thiam turin mizo mipuite a sawm nghal bawk a ni.
Incentive Cash Award Scheme 2022- hmang hian Commonwealth Games 2022 -a Gold medal lata Jeremy Lalrinnunga leh Hockey-a Bronze medal lata Lalremsiami te hnenhah pawisa fai hlan a lo nih tawh thu tarlangin Pu Robert Romawia Royte chuan Sports Minister anih lai ngei a Mizoram mai nilo India ram in hetiang hlawhthilnna a chang chu vanneih a intih thu sawiin an kal leh zel na turah duhsakna a hlan nghal a.Mizote hian National leh International level-ah pawh medal tamzawk dawng thei turin theihna lian tak an nei tih inhriaa nasa leh uar zawk a tan la thar tur in kalkhawmte leh mizo thalaite a sawm nghal bawk a ni.
Khualzahawm Pu T.C. Pachhunga,Vice-Chairman, Sports & Tourism Development Board-pawhin thusawiin,infiamna lama hmasawnna tur a theihthawp chhuah thin Sports Minister chu fakawm a ti a,zan chhinchhiah tlak tak a ni, a ti.Zanin a Award semna inkhawm hian thalaite zingah chona thar a pek ngei a beisei thu tarlangin,ruhhlo laka fihlim turin mahni inthunun theihna ngaipawimawh thar turin kalkhawmte a chah bawk a ni.
Incentive Cash Award 2020-2021-hi infiamna discipline hrang hrang 11 heng: Taekwondo,Muaythai,Shooting,Arm wrestling,Table Tennis,Boxing,Motor sport, Sepaktakrow,Kick boxing,Weightlifting, leh Football-a medal late infiammi 109 leh official mi 14 ,an vaiin mi123-te hnenah sem a ni a.Heng discipline a medal lak zat hi 199 a ni a,tun tuma Incentive Cash Award sem zat hi a vaiin Rs 44,88,150 niin kum 2020-2021 chhunga medal dawngtute hnenah Rs 22,88,150 leh kum 2022-a buatsaih Khelo India Youth Games 2021-a tel medal dawngtute hnenah Rs 22,00,000 pek a ni.
Zanin a Incentive Cash Award semna inkhawm ah hian Pu Lalnunhlua,Director Sports & Youth Services Department chuan kalkhawmte lawmna leh report pekna a nei a,Pu John Tanpuia, Secretary,Mizoram State Sports Council chuan lawmthu sawina hun a hmang bawk a ni.
Attachment
- Loading attachment...
