Vawiin khan Sports Minister Pu Zodintluanga chuan Mizoram State Sports Council ruahmanna hnuaia ITI Veng-a International Standard Swimming Pool leh Rajiv Gandhi Stadium Stadium, Mualpui bulah Multi Purpose Indoor Hall sak mek te chu a hmuna kalin a tlawh. Minister hi Mizoram State Sports Council-a hotute leh Aquatics Association of Mizoram hruaitute ten an tawiawm a ni.

Swimming Pool sak mek a tlawh hnu hian Minister chuan Mizoramin standard swimming pool a neih hma pawha Mizo thalai tuihleuh thiam ten inelnaah medal la an awm chu lawmawm a tih thu a sawi a. Standard Swimming Pool hi kumin chhunga peihfel tum anih thusawiin Pu Zodintlaunga chuan swimming pool siam zawh anih hunah beiseina hi a sang leh zawk thei dawn a ni tiin chumi hunah chuan coach te pawh chahchhuakin Mizo thalai hemi lama tui mi te tan kawng thui tak a in hawng thei dawn a ni a ti. Sawrkar chuan thalai te tan infiamna hmun hma chi hrang hrang a buatsaih chho zel a, infiammi lakah beiseina sang tak a neih thu a sawi bawk a ni.

ITI Venga International Standard Swimming Pool sak mek hi a dung metre 50 niin, a vang hi metre 25 a ni a, a thuk zawng hi metre 1.35 niin a thuk lai ber chu metre 2 tura ruahman a ni. A bulah hian Diving Pool, a dung metre 18, a vang metre 15, metre 5 a thuk chu siam a ni bawk dawn. Tunah hian Swimming Pool chhuat cghu chun mek a ni a, diving pool tur pawh laih fel a ni tawh. He Project atan hian Special Plan Assistance atangin cheng nuai 400 ruahman niin Lushai Engineers Private Limited-in he hna hi an thawk mek a ni.

Mualpui-a Multipurpose Indoor Hall sak mek hi chawng hnih tura ruahman a ni a, he Hall hi a dung metre 60, a vang metre 40 tur a ni. Ground Floor hi parking hmun atan ruahman a ni dawn a, hetah hian motor 78 vel a dah thei dawn a ni. First Floor hi indoor sports hrang hrang khelh thei turin a hmunhma hi chei tum a niin a Gallery ah hian mi 1075 vel an leng dawn a ni. He Project cheng nuai 749 man hi Ministry of Sports & Youth Services hnuaia Urban Sports Infrastructure Scheme kaltanga hmuh a niin a satu hi Pu R Sangkhuma a ni.