Vawiin khan Chhimveng YMA Hall, Mamit ah MPSC Pre-Examination Centre chu Pu TT Zothansanga Parl. Secretary, Transports etc. chuan hawngin 'Thiam theih aiin taimak leh tumruh a pawimawh tawh zawk a ni' a ti a; tunlai hmasawnna in a ken tel, T.V., Mobile, Internet etc. te hi a tangkai em em rualin kan chhiatpui erawh a hlauhawm hle a ni tiin zirlaite hemi kawngah hian kan in thunun a pawimawh hle a ni a ti bawk.

A thei nazawngin IAS/IFS/IPS leh Central service dangte nih kan tum a, a hlawhtling kan awm laiin hlawhtlinglo te pawh kan awm, intihhnual tumna ni lovin Staff Selection Commision-in an hna lak, Assistant hrang hrangte leh a dangte tih nachang hriat a tul hle a ni tiin keimahni kan inhriatchian hle a pawimawh a ni a ti bawk.

Tuna MPSC kan hawn hi District dangte tan a ni lova, Mamit District tan a ni tiin tun hi a rahbi hmasaber a ni a, a hlawhtlinna chu tuna zirlai ni te bakah zirtirtute an ni tiin zirtirtu pawh theihtawp chhuah a an zirlaite tanpui turin a chah bawk. Hetih rual hian tlawmngai pawl hrang hrangte, khawtlang nu leh pate pawh zirlaite hmakhua hriatthiampuia kawng hrang hrangah hun kian thiam turin a chah bawk.

A sawi zel naah khuallian chuan MPSC in exam a buatsaih reng reng hi a thianghlimin a fair em em a, mi tlingte chauh lak an ni thin tiin chhungte belhbul tur neih a ngai lova, hmelhriat neih that a pawimawh lo, keimahni kan thiam em? tih chiah a pawimawh a ni a ti bawk.

Pu K. Riachho, Chairman MPSC pawhin thusawiin Mamit khawpui a MPSC Exam Center hawn hian Exam tumte tan awlsamna tamtak a thlen thei dawn a ni tiin District chhung a zirlai rilru chak tak tak te tan kawng a inhawng a ni a ti bawk.

MPSC Chairman chuan Exam conduct hunah District thuneitute leh College a thawktute tawiawmna a tul dawn thu sawiin theihtawp chhuahpui turin a sawm bawk.

He MPSC Pre-Exam Centre hawnna hi Pu RS Lalzamliana, DC Mamit in kaihruaiin Pastor PC Malsawmtluanga’n hunserh a hmang a, Sub-YMA Zaipawlin hawnna hla an sa.

MPSC Pre-Exam Centre atan hian Gov’t. Mamit College chu tihfel a ni.

He MPSC Pre-Exam Centre hawnnaah hian Head of Offices, khawtlang hruaitute, tlawmngai pawl hruiaitute, College Zirtirtute, MZP hruaitute leh thuthar thehdarh tute an tel a ni.

Attachment

  • Loading attachment...