No.7181/2020-2021
     Tukin zing khan Sports Minister Pu Robert Romawia Royte chuan Mualpui R.Dengthuama Hall kawt zawla Outdoor Gym siam mek chu a hmunah a tlawh a.  Mizoramin a la neih ngai loh Outdoor Gym 2 a nei thar tur chu lawmawm a tih thu a sawi. 
     Pu Robert Romawia chuan Outdoor Gym hi khawvel hmun hrang hrangah leh India khawpui lianah te an uar hle a. Man chawi ngai lova a duh apiangin excercise an lak theih nana siam a ni, a ti a. "Khelo India State Centre of Exellence hmun ngeia Outdoor Gym awm tur hi a remchangin a lawmawm hle a ni” Minister chuan a ti. 
     Outdoor Gym set 1 hi kum 5 Warranty nen cheng nuai 60 zel a ni a, Arihant Industrial Corporation siam niin, an Authorised Dealer Mapuia Enterprise, Aizawlin supply-in an remkhawm a, kum 5 chhung a thlawnin  a enkawl zui dawn a ni.
      Minister hian Mualpuia Sports Hostel building 2 sak mek te pawh a tlawh nghal a. Khelo India State Centre of Exellence atana hman tel tur a nih avangin chak zawka hnathawh a tul thu MSSC Engineers te a hrilh a. Upper Republic-a MSR Gym pawh tlawhin Sorkar puihna tel lova mi malin infiamna hmunhma țha tak tak an din ta chu lawmawm a tih thu sawiin, Sports hi industry hlawhtling tak, mi tam takin eizawnna leh sumdawn nana an hman chhoh zel tur a ni a ti. 
     Pu Robert Romawia chuan Sports chu Mizoram Sorkarin industry status a pek tawh avangin mi mal te pawhin sumdawn nan an hmang tan mek a, infiamna hmunhma buatsaihtu ten bank loan leh Sorkar subsidy te pawh an hmang tangkai thei ve tawh dawn tih a sawi bawk.
     Sports minister chuan  MINECO Complex-a Outdoor Gym siam mek pawh a enfiah bawk a. Mizo mipui te zingah taksa insawizawi ngaih pawimawhna a len chhoh zel avangin Fitness atana pawimawh chi hrang hrang sorkarin a ngaihtuah zel tur thu a sawi.
     Tukin zinga Sports Minister-in Fitness Gym 3 a tlawhnaah hian MSSC Engineers te leh Local Council hotute bakah khawtlang hruaituten an tawiawm a. Aizawl East-II bialtu MLA a nih angin a bial chhung Aizawl Civil Hospital-a Covid Vaccine pek țanna hmun pawh a tlawh a, ruahmanna felfai tak hnuaia vaccine pekna kalpui a ni chu lawmawm a ti hle a ni.
      Pu Robert Romawia hian nimin zing karah khan Chanmari Mini Sports Complex tlawhin a sak that dan turte a en a. Mizoramin infiamnaa hma a sawnnaah Chanmari Veng chuan sports discipline hrang hrangah an thawh hlawk tak zet tih sawiin Mizorama ‘sports power house’ tih tling nia a hriat thu a sawi. Chanmari Mini Sports Complex atan sanction la awm lo mah se, projects siamin hma lak mek a nih thu a tarlang a. 
     Chanmari Mini Sports Sports Complex a tlawhna ah hian Bialtu MLA Pu C.Lalmuanpuia pawhin thu a sawi a.  Bialtu MLA bakah MNF Councillor Candidate Pu Rochhunga Ralte, SEDP Board Vice Chairman ni bawk leh Pu Lalsangliana, Sports Director te, Pu John Tanpuia, Secretary MSSC te, MSSC Engineer te leh Chanmari Local Council leh Branch YMA hruaituten Sports Minister hi an tawiawm a ni.

Attachment

  • Loading attachment...